亞視計劃開拍電視版《英雄本色》如果無綫版搵邊個飾演Mark哥？

1986年出品嘅經典電影《英雄本色》， 由吳宇森執導、周潤發、狄龍、張國榮主演 ， 紅遍亞洲 ，多年來仍受到各界關注。近日有傳亞視有意重拍經典電視劇版《英雄本色》，亞洲電視總裁吳雨亦證實呢個消息，佢話電視劇版會同北京公司合作，正在就籌備緊劇本。但吳雨話為搵演員一事好頭疼，如果無綫又開拍嘅話，搵邊位男演員飾演三大經典角色呢？

Mark哥

電影中Mark哥一角由周潤發飾演，佢係黑社會大佬，亦係宋子豪（狄龍飾）嘅兄弟。劇中佢由黑社會大佬到潦倒幫人洗車賺錢，但佢都忍辱負重等子豪返嚟東山再起。角色可以考慮袁偉豪飾演，首先佢嘅身高、樣貌都幾適合著大風褸、帶住墨鏡、揸住兩支鎗。再加上Mark哥經常含住支牙簽都好襯佢。

宋子豪

宋子豪一角原本由狄龍飾演，佢係香港黑社會大佬，為人重情重義，注重兄弟之情完全表現到出嚟。電視劇版可以考慮王浩信，佢喺多套劇集中都好有「江湖道義」，好似《踩過界》中飾演嘅盲俠，佢無論對朋友定兄弟，都係不求回報。

宋子傑

宋子傑原本由張國榮飾演，佢係一名靚仔又正直嘅督察，討厭做黑社會嘅哥哥。角色雖然係警察，但行為比較衝動。何廣沛同樣擁有正直嘅外表，好適合扮演警察。而且可以做到宋子傑一開頭俊朗無邪，到後來遭遇巨變而討厭佢哥哥。

除咗以上嘅提議，大家又覺得邊個飾演呢三個經典角色較為合適呢？