人治公司無理規矩事件簿

香港人工時全球最長，每日喺公司嘅時間隨時多過喺屋企，返工時間多過自己時間，如果自己返緊嘅唔係一間理想嘅公司，生活真係好淒慘架！偏偏呢個世界原來有好多公司都係講求「人治」，即係老闆話乜就乜，以致公司出現好多無理規定。而且好多時大家睇真少少，規定好似係希望管理員工，保障公司，不過好多規定望真啲，係純粹用作刻扣員工福利、或者純為老闆利益，根本並非為公司。其實公司定埋咁多無理規定，雖然員工可能暫時屈服喺你「淫威」之下，但係長久嚟講嚴重打擊同事士氣，亦有損公司聲譽！

每天接吻時段

早前流傳嘅視頻，北京有一間公司規定所有女員工每朝必須跟老闆接吻，由9點至9:30為接吻時段，男老闆輪流同女同事（只限女同事啦當然）嘴對嘴錫錫，並稱為加強員工同公司嘅凝聚力喎。

必須著全套公司牌子

唔少大型服裝品牌都規定員工由頭到腳必須穿該公司牌子嘅出品，而且仲要唔係全部由公司提供，員工須要自行購買；至於公司無出嘅產品，例如Accessories，就唔戴得喇。

事假扣1.3日人工

員工有時臨時需要請假，遇著有特殊情況，可能會請No-pay，不過原來有公司就為咗令「員工不請事假以致影響公司運作」，將請假扣糧變成1.3日！而且年終分紅時，仲會按比例扣除你請假嘅日子，好小家呢。

擺嘢出位罰錢

有公司就為咗希望員張枱整齊啲，只要見到有任何屬於該員嘅物品離開咗員工枱面範圍，就會即刻罰錢；原本你話管理好自己物品都係合埋，問題就係公司本身係做零售，每位員工都有好多樣品跟身，根本收唔晒喺個位度呢。