黑色月光｜楊茜堯漸進式恥笑演繹多重情緒 被讚神演技：有種令人心寒嘅感覺

無綫台慶劇《黑色月光》由楊茜堯，王浩信、林夏薇、馬志威、黃翠如及楊卓娜等演出，係一套以公關業為背景嘅復仇劇。早於今年年初釋出預告片時，楊茜堯嘅招牌奸笑就被觀眾大讚，指隔住螢幕都感受到佢嘅霸氣；隨著《黑色月光》播出，唔少網民大讚楊茜堯嘅演出令人有種心寒嘅感覺，又指佢係全能型演員。

前日（4日）播出一集講述余滿月（楊茜堯飾）為令仇人蔣基俊（馬志威飾）盡快跌入圈套，以債務威脅蔣基俊跟班Barry（馬貫東飾）助攻，呢場戲只有兩分鐘，楊茜堯亦僅四句對白，但其連環眼神殺及漸進式恥笑就演繹出多重情緒，由奸險冷笑、勝利恥笑到側頭及擰轉面大笑，再補上一句：「其實我份人好易話為架咋」，令場口張力十足，唔少網民都留言大讚楊茜堯，表示劇中一句「你係咪傻架？」可以做表情包，又指楊茜堯係現代版嘅麗妃娘娘。

另外，楊茜堯於劇中對住親妹曦晨（黃翠如飾）時候嘅表情又充滿憐愛感，眼神更會帶著笑意，獲網民大讚全能，又認為佢係今年視后人選：「今年視后支持楊茜堯」、「楊怡真係神演技」、「唔使講嘢都知佢諗緊咩」、「楊枱（楊茜堯）拎硬視后」、「楊做奸角好似呢套咁，有種令人心寒嘅感覺，同阿旺一樣，真係奸又得、正義又得」等等。

此外，蔣太（文雪兒飾）購買名牌「卡索利」銀色閃鑽特別版手袋畀媳婦卓慧雲（林夏薇飾），林夏薇因賭博輸錢，要用該手袋作抵押，但就被蔣太要求帶著該手袋出席時裝秀時，於是只能購買高仿品冒充真品，有網民發現該手袋係內地某小眾品牌出品，引起熱話，表示想買個同款手袋。另一話題就係於《法證先鋒VI：倖存者的救贖》飾演Nana嘅蔣祖曼以名模身份現身宴會天橋上行catwalk，短短16秒鏡頭拍足大半個晚上，又用上六部機一齊拍，製作相當認真；蔣祖曼就話呢幕令Nana呢個角色變得圓滿。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！