今屆奧運受到注目嘅靚仔靚女新星

靚仔區：

Arthur Mariano－巴西（22歲）

嘩，真係好靚仔呀～你睇吓呢位巴西體操選手Mariano，佢笑起嚟有「酒凹」架，簡直治癒一眾少女心，點解可以有咁陽光嘅少年？又有肌肉又靚仔，真係迷死人啦。22歲嘅佢係第一次參加奧運，不過實力不容忽視，佢去年參加世界體操錦標賽就喺單槓項目奪得第四。今屆奧運就會出戰男子體操團體、自由體操、吊環、鞍馬等多個項目，大把機會畀大家睇呢位日本同巴西混血兒靚仔。

寧澤濤－中國（23歲）

作為中國泳隊嘅顏值擔當(即係最靚仔果個咁解），23歲嘅佢成為中國體壇人氣小鮮肉，微博已經有超過500萬Fans啦。佢係2014年仁川亞運中一戰成名，分別奪得兩個個人金牌同兩個團體金牌，並打破男子100公尺捷泳亞洲紀錄。去年第一次參加俄羅斯世界游泳錦標賽，就奪得男子100公尺捷泳金牌，成為第一位喺游泳世錦賽得到短程冠軍嘅亞洲人。今次奧運雖然佢係第一次參加，但已經有唔少中國人睇好佢奪金。

宮原和也－日本（20歲）

宮原和也帥氣嘅模樣十足十日本偶像劇男主角，佢唔單止靚仔，球技都唔錯架。佢15歲就已經被選為日本代表隊，已經以國家隊參加過多項比賽，現時效力廣島職業足球隊中場位置， 被喻為內田篤人嘅接班人。今次里約奧運係佢第一次參加奧運，有望成為日本足球界矚目新星。

靚女區：

何詩蓓－香港（18歲）

講到第一次參加就受到矚目嘅靚女，小編點可以唔先講有「小美人魚」、「香港小飛魚」之稱嘅何詩蓓呢？爸爸係愛爾蘭人，媽媽係香港人，自細喺香港土生土長。6歲接受泳隊訓練，10歲就代表香港出賽，13歲更刷新400公尺個人混合式嘅香港紀錄，之後亦先後喺杜拜世青賽、天津東亞運、南京青奧會、仁川亞運奪得多塊獎牌。現年18歲嘅佢，去年分別喺女子200公尺混合式初賽同200公尺捷泳決賽時，游出2分13秒07及1分58秒48，達到里約奧運A標，成為香港首名達到奧運A標而直入奧運嘅泳手。

不過唔好以為運動員就一定讀書唔叻，何詩蓓曾經表示「重視學業，游水只是興趣」，為咗準備DSE唯有減少練習，不過考試期間依然出賽，更做到里約奧運B標紀錄。而其DSE亦奪得7科35分佳績，包括通識教育（5**）、英文（5*）、數學（5）、企業會計與財務概念（5）、中文（4）、化學（4）及英語文學（4），獲得2015/16年度QS世界大學排名30嘅University of Michigan取錄。

Yusra Mardini－難民代表隊（18歲）

樣子甜美嘅Mardini原本係敘利亞游泳運動員，3歲起接受訓練，不過國家經常動亂，試過喺屋頂被炸開嘅泳池到訓練。後來敘利亞發生內戰，屋企被戰火摧毀，迫不得已要逃離敘利亞。先後經過黎巴嫩、土耳其、希臘、塞爾維亞、匈牙利、奧地利等地，歷時25日先到達德國。偷渡去希臘期間，佢同姐姐連同18個難民逼係一隻通常只可以載6-7人嘅小船，於是去到愛琴海船開始入水並停止運作，佢唯有同另外3人一齊落水推船，推足3個半鐘先上到岸。

好彩去到德國可以繼續接受游泳訓練，並成為難民代表隊一員，出戰里約奧運100米自由式同100米蝶泳兩個項目。雖然佢最後無緣決賽，不過佢已經將佢參賽嘅Message：「我想讓所有人知道，經歷一切傷痛、風暴之後，總會有平靜的日子。」帶到畀全世界啦。

劉湘－中國（19歲）

有「中國泳壇第一美女」之稱嘅劉湘，高1米8嘅她不時喺個人微博展示長腿，又上載多張女神便服相同Fans頻頻互動，所以至今吸引超32萬Fans。劉湘除咗有顏值，一樣有實力。15歲奪得全國游泳錦標賽 女子50米蝶泳比賽冠軍，去年又奪得世界游泳錦標賽女子50米仰泳銅牌。而今年係佢第一次出戰奧運，參加女子50米自由式項目，亦被視為中國泳隊奪金希望。

圖片來源：何詩蓓Facebook、何詩蓓 Instagram、Yusra Mardini Facebook、Yusra Mardini Instagram、劉湘微博、Arthur Mariano Instagram、寧澤濤微博、宮原和也Twitter