仲買樓？識寫信感動業主 千萬筍盤送俾你

仲死儲爛儲儲首期？學吓寫字好過啦。   加拿大阿爾伯特一間價值160萬加元（約940萬港元）嘅大宅，5000呎，三間睡房，仲有間房擺琴同酒窖。只要25蚊加紙（約＄147港元）就有機會得到。   「有機會」，即係唔係俾到百幾蚊就做得業主啦。有條件嘅，就係要你支筆得。   呢間屋嘅業主Alla，因為背部傷患，唔方便上落樓梯，於是想放盤，但係居然搵唔到買家。咁減價囉，結果都係無人問津。

於是佢就諗到一個方法︰搞個”Write a letter, Win a house”（寫封信贏間屋）比賽。只要你寫一封「得到呢間屋如何改變人生」嘅信，再俾25蚊報名費，你就有機會成為新業主。Alla話意念源自一套舊戲Spitfire Grill，講餐廳主人患病，於是透過「徵文比賽」幫餐廳搵新老闆。佢又話好唔捨得間屋，所以希望新屋主要合佢心水，又可以同鄰居夾得來。   封信係咪要好催淚先得？Alla講明唔駛，最緊要能夠觸動到佢喎，仲話「我係個實際人」。咁佢份人真係幾實際，想呢個比賽有6萬人參加，埋單佢就可以收返150萬加元，即係同賣價差唔多。而且要到最低參加人數先至繼續舉行，比賽期間亦會照舊放盤，如果賣得出會回水。   計落，咁做仲可以俾少好多物業稅，仲賺埋名氣，一定冇得輸，果然係高手。原文傳送門【相關搜尋】香港買樓要唔飲唔食21年