《使徒行者3》魏德禮奸到出汁 重溫馬國明反派角色

台慶劇《使徒行者3》正在熱播中，新加入嘅馬國明破格飾演大反派魏德禮，染上一頭搶鏡嘅灰白髮，造型相當有型，令觀眾感到十分驚喜。馬國明戇直及乖乖仔形象深入民心，所以佢入行多年都好少飾演反派角色，而家就同大家睇下馬明奸到出汁嘅反派角色啦！

《使徒行者3》魏德禮
《使徒行者2》結尾有彩彈，就係閃出一幕馬國明，而《使徒行者3》就延續上輯劇情，講述馬國明飾演魏德信（陳豪飾）同父異母細佬魏德禮。劇集初期佢以「黑市器官中介」克萊因登場，其後又自揭身份係保安局首席調查官韋作榮。其實佢真正身份係「劇集終極Boss」，奸到出汁嘅佢為咗上位，不惜指示囚犯殺死獄中生父韋爺。想知魏德禮有幾心狠手辣嘅話，大家就記得繼續收睇啦！

《飛虎》杜天宇
馬國明喺劇中飾演賊王杜天宇，絕對係一位高智商罪犯，佢每次犯案都會精心部署，所以每次都因為證據不足而要釋放佢。生性凶狠嘅佢，最後挾持旅行社小輪上嘅乘客，當中包括死對頭展瀚韜（馬德鐘飾）嘅父母，更用人肉炸彈自殺，意圖同歸於盡。唔少網民睇完之後都認為佢演得入木三分，令人留下深刻印象。

《真相》江洛汶
劇中馬國明與唐詩詠飾演一對情侶，當大家以為佢係斯斯文文會計師，亦係好男友嘅時候，原來佢嘅真正身份係一位黑幫人士，而且仲買兇想殺死女朋友。既貪錢又造假數嘅Alex江洛汶，因有份洗黑錢而入獄，最終於獄中被人尋仇，用刀插死。

《女拳》游三水
原本心地善良又好人嘅游三水，因為長期處於被人冤枉及侮辱狀態，於是立下心腸要出人頭地，結果慢慢由忠變奸，最後喺火車被老婆（梁嘉琪飾）用刀狂插致死。游三水由忠變為奸，令大家肯定馬國明出色嘅演技。

《紫禁驚雷》愛新覺羅·福全
馬國明喺劇中飾演狼子野心嘅皇爺愛新覺羅·福全，為人奸詐又機關算盡，更利用親兄弟聶多寶（馬浚偉飾）。不過最終害人終害己，被康熙帝（陳國邦飾）放逐至蒙古。