《使徒行者3》麥美恩被活摘器官慘死 演技獲網民讚賞

無綫台慶劇《使徒行者3》由林峯、苗僑偉、馬國明、黃翠如及袁偉豪等人主演，劇集播咗3集就已經成為網上熱話，但並唔係討論一班主角嘅表現，而係平時做開節目主持嘅麥美恩（Mayanne）。佢喺劇中飾演卧底朱倩，被爆seed（林峯飾）安排混入模特兒公司查出失蹤台灣姊妹花下落。後來更被賣去做妓女，可惜救二寶（楊埕飾）時被對方發現臥底身份，被器官販賣集團捉走，活生生將佢器官摘取以致慘死。

Mayanne扮妓女嗰陣同農夫嘅對手戲已經好好笑，性感造型配上「譚仔阿姐」音調，之後又冰桶淋身吸引嫖客農夫，成功引起來網民討論。但佢慘死嗰幕，被人活摘器官嗰種孤獨、掙札同無奈，到最後無力反抗而壯烈犧牲，Mayanne真係演得好好。雖然只得兩集戲份已獲觀眾認同，紛紛留言大讚佢：「你做得好好」、「我見到呢幕個陣真係好想喊，太慘了」、「今集真係演得好好」、「真心做得好好～加油～」及「唔捨得。。。好想睇多d你演戲」等等。

噚晚，See See TVB Facebook專頁就上載咗一條朱倩番外篇嘅短片，講返佢點樣搵到自己Handler爆seed。片中Mayanne除咗繼續發揮搞笑本色之外，仲有好有型嘅街頭槍戰，兩者佢都演得入型入格而獲得網民讚賞。希望佢之後有更多機會演唔同嘅角色，等大家可以睇到佢嘅演出啦！