雅虎香港新聞 《使徒行者2》 首播 近年深刻印象無綫臥底角色數一數
警匪片一向都係無綫嘅救市之作，而臥底片就更加係收視嘅靈丹妙藥，真係萬試萬靈！所以喺依家收視插水嘅時候當然要出臥底劇《使徒行者2》出嚟止血啦！
無綫出過唔少臥底劇，雖然當中不乏膠劇，不過劇中唔少臥底角色都令人有深刻印象，唔知大家最鐘意邊個呢？
《學警狙擊》／《潛行狙擊》Laughing哥（謝天華飾）
要數出色臥底，點可以冇Laughing哥！謝天華喺《學警狙擊》中飾演梁笑棠（Laughing哥）大受歡迎。就算你無睇套劇，你都一定聽過Laughing哥呢個大名！本來佢喺劇中嘅身份係黑社會大佬、表面上囂張串串貢、又野心勃勃，冇將任何人放在眼內兼成日得罪人。後來發現其實佢係臥底，最後仲為咗幫吳卓羲飾演嘅鍾立文上位而犧牲自己性命。該集播出之後一班網民都戥佢唔抵，喺網上為「Laughing哥」設立悼念區，仲���超過10萬人悼念同「拜祭」，真係史無前例。網民紛紛話謝天華演技精湛、江湖味重、係全劇最搶鏡演員。更有網民話為佢流下男兒淚添！之後，無綫更為Laughing哥開拍劇集《潛行狙擊》及電影《Laughing Gor之變節》、《Laughing Gor之潛罪犯》。
《使徒行者》爆seed（林峯飾）
《使徒行者》係林峯喺無綫嘅最後一部作品，而佢呢個叫「爆Seed」嘅角色原來源自卡通片，意思係佢喺重要關頭就會突然間小宇宙爆發變得好勁。佢呢個角色屬於傳統嘅臥底角色，單親家庭長大、爸爸係黑幫古惑仔、自細就喺江湖打滾，不過市井得嚟又好有人情味。曾經做過撻沙手下、之後又成為歡喜哥嘅愛將。不過其實佢嘅真正身份係刑事情報科被刪除資料而失聯嘅五個卧底其中之一。
《使徒行者》釘姐（佘詩曼飾）
喺劇中飾演足浴店按摩女郎丁小嘉「釘姐」雖然表面性格豪放貪錢，不過其實佢嘅真實身份亦都係失聯嘅五個卧底其中之一。後得刑事情報科總督察卓凱（苗僑偉飾）以新接頭人身份聯絡，希望佢可以幫手搵返另外四名下落不明嘅臥底。而釘姐就喺乾媽間按摩店負責收風，性格有義氣、精靈鬼馬又有型，係大台少有嘅女臥底中嘅表表者。
《使徒行者》Kobe（沈震軒飾）
劇集《使徒行者》中飾演連浩勤（Kobe）一角而人氣急升，佢除咗因為醒目有型，不斷深入社團內部調查之外，最令觀眾難忘嘅一定係佢最終被驗出有腦癌末期，出師未捷身先死。而佢同阿Yan（陳敏之飾）嘅悽美愛情當然令到一班女士心碎。
《叛逃》莊有正（陳展鵬飾）
講起《叛逃》大家可能會諗起佢係「神級膠劇」，不過其實佢原本係一套以反恐為主題嘅警匪片。起初呢個新鮮嘅題材一開始的確吸引唔少觀衆眼球，一開播就已經有30點嘅高收視。不過可惜只係好睇咗兩集，之後走勢就急轉直下。講返個故仔，莊有正為咗幫補家計加入CID，之後加入黑幫組織做臥底，同細佬有傑裏應外合，最後成功殲滅恐怖分子。雖然劇情聽落幾緊張刺激，不過可惜兩兄弟同時愛上陳茵媺嘅老土劇情、兩兄弟又懶係friend等嘅兄弟情、再加上劇情嘅漏洞令到觀眾睇唔過眼，搞到收視插水。
《學警狙擊》鍾立文（吳卓羲飾）
話說江世孝（苗僑偉飾）由台灣服完刑返香港，一邊搵女一邊部署向黑幫龍頭大哥杜亦天報仇。其後佢就誘導鍾立文同衝鋒隊警員李柏翹（陳鍵鋒飾）合作，希望可以一齊摺起杜亦天（林利飾）嘅製毒工場。不過李柏翹就死都唔肯同賊合作，但係鍾立文就希望將江世孝轉為警方線人，於是就同江世孝建立一段相互利用嘅關係，之後仲轉埋去做江世孝嘅手下。已經離開無綫嘅吳卓羲經常飾演警察，但係今次係佢第一次飾演卧底。之前經常被批評演技嘅佢今次就俾人讚佢交到臥底矛盾嘅內心戲、演繹到位。
《點解阿Sir係阿Sir》羅耀華（陳豪飾）
《點解阿Sir係阿Sir》可以話係咁多套關於臥底劇集中最特別嘅一套，因為有別於其他打打殺殺嘅警匪片，呢齣偏向搞笑，而且陳豪飾演嘅羅耀華係一名中學教師，所以佢對學生多過對賊。劇情講述羅耀華原本係老師嘅佢出生紀律世家，可惜多次考警察失敗。突然接到警司潘國誠通知要佢返中學做臥底，調查黑幫校園毒網。不過令觀眾最深刻嘅唔係佢查案了得，而係佢竟然為咗查案接近Miss Koo（鍾嘉欣飾）同時又 一腳踏兩船同Miss Ho（楊怡飾）相戀，搞到Miss Koo 崩潰痛哭，唔少人上網鬧爆。雖然有網民話佢抄《逃學威龍》，不過佢最高收視都有38點。
