信用卡被盜用搵《東張》幫手 苦主原來同HOY TV有淵源 網民︰唔搵《一線搜查》幫手

而家唔少人遇到騙案或者糾紛，都會搵TVB節目《東張西望》幫手。近日有市民因為信用卡被盜用、但指銀行無積極幫忙嘅苦主搵《東張》投訴。呢位投訴人原來係前TVB監製、現為「好好製作」節目監製嘅張志明個孖生阿哥張志文。由於「好好製作」為HOY TV製作唔少節目，有人就話張志文寧願搵《東張》都唔搵HOY TV同類節目《一線搜查》幫手，咁做會唔會得罪「好好製作」揸fit人余詠珊？

根據《東張》報導，張志文今年1月中用信用卡上網買嘢，發現輸入資料後有異樣，同日下晝更收到銀行通知，話已經由信用卡扣款過萬元。張志文於是打去銀行了解，並強調唔係佢碌卡，銀行當時話會調查，佢唔駛找數。點知到3月，銀行以消費係由張志文個電話嘅Google Pay支付為由，判斷嗰次碌卡係有效簽賬交易，因此唔可以撤銷。張志文批評銀行無好好把關，令佢遭受損失。

張志文胞弟張志明係資深電視人，曾經為TVB多個綜藝節目擔任製作人，作品有《食平D》、《3日2夜》、《周遊東京》等。張志明係TVB前高層余詠珊愛將之一，多年前余喺亞視及有線工作時二人已經合作。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！