做friend做到咁cheap...小心遠離5種「假朋友」

一班朋友party夾份買嘢食再share錢好平常，點知咁都有人會乘機掠水!

有連登巴打網上發文投訴，於舊同事聚會時有人主動請纓負責買壽司，但當日壽司食起嚟質感較硬、飯身比平常食開細小，覺得怪怪哋，但因為塑膠盒同埋豉油芥茉包，同平時元氣嘅包裝一樣，於是都冇理到繼續食。

之後巴打同兩位友人經過爭鮮，發現入面賣嘅壽司同頭先食嘅一模一樣！為咗試真啲，3人即場買幾件試下，發現味道同口感都同頭先party食嘅完全一樣!咁大家都明咩事啦，有人「偷龍轉鳳」買平價壽司搵著數，加上巴打補充眾人都有影低買咗咩食物嘅收據夾錢，唯獨係嗰位朋友只係將每樣嘢食喺whatsapp打低…

朋友我當你一世朋友…其實你交個心出來唔代表對方都係架，巴打呢次百幾蚊就睇清一個人，算抵!揀朋友都有學問，有以下5種行為嘅「假朋友」，unfriend算吧啦!

1.Hi Bye Friend

唔駛多講，見面時先會打打招呼，私底下根本冇嘢好傾，同陌生人冇太大分別。

2.過橋抽板

有一種人一定要避開，就係過橋抽板、同埋「有事鍾無艷、無事夏迎春」嘅朋友。口口聲聲當你係好朋友，但當你幫過佢，佢立即對你態度有變，擺明係利益至上啦。就算唔涉及利益咁沉重，身邊嗰啲好日都唔搵你，當佢冇嘢做先搵你攝時間嘅朋友，其實都唔會係真朋友。

3.有異性冇人性

男朋友係重要，但好朋友係唔會因為有另一半而失約，亦唔會只顧見另一半而唔記得你，拍緊拖一樣可以喺愛情同埋友情攞個平衡點。

4.是非精

如果對方一見到你淨係識講是非八卦，又或者想探口風，呢類人只係想是非當人情，一心利用是非同人打熟關係，未必係真正朋友。

5.根根計較

有種朋友未必係因為目的而接近你，但亦可能係自私鬼，又小氣又計較，就算唔關錢銀事，亦可以係約會日期、食飯地點等，乜都要就哂佢計到盡先開心，計較嘅人通常都好記仇，就算好小事都會令佢不滿!

圖片來源：www.pakutaso.com