傳不滿葉蒨文鍾培生出雙入對 袁嘉敏「唔見得光」眼火爆

袁嘉敏（Candy）與鍾培生反面，昨日有指跟《愛．回家之開心速遞》「島大女神」葉蒨文（Sophie）有關！去年Candy與鍾培生撻着，男方拒絕讓女方見光，就算經常在鍾家過夜，都不願讓關係公開，反而經常跟Sophie出雙入對。對此，Sophie承認跟男方認識多年，去年亦有一齊出席仁濟Ball，不過從無發展過！

「鍾袁大戰」花生愈剝愈多，昨日有指袁嘉敏與鍾培生「再見不是朋友」，全因男方去年與Candy撻着，女方更當上他的軍師，鍾培生事無大小都會搵她去傾，問女方意見，並且經常在鍾家過夜，但可惜這段關係永遠都是「不能說的秘密」，相反，鍾培生在外卻跟不少女生扯上關係，更經常跟葉蒨文出雙入對，結果辣着Candy！不過，雖然鍾培生把Candy「收埋」，但據知「經濟支持」每次廿幾萬，總共進帳近百萬，數目都不少。

記者就此事致電3位當事人，Sophie承認與鍾培生認識多年，亦曾跟對方去仁濟晚宴，她說：「識咗好多年啦，有咁嘅傳聞可能因為之前去過仁濟個慈善晚會啫，但唔係佢帶我去，係我哋成班一齊去，普通聚會啫。」Candy亦指跟鍾培生關係惡化，並非因其他女人，至於近百萬「支持金」，她則表示：「冇，數目很少，不值得提。」昨日上載了行山新相的鍾培生至截稿前仍未有回覆。

林作出賣朋友

另外，林作於社交網指前晚與Candy取得聯絡，並指網民付款500元便能得知內容，之後更指自己「收錢收到手軟」，但原來對話只是閒話幾句，被網民鬧爆「抽水王」，Candy對此亦怒不可遏，直指500蚊可以讓大家看到林作出賣朋友，並謂：「這種男人也真悲哀。」至於林作則指自己不算出賣朋友，並發火直斥：「啲對話都冇料到，我亦冇任何利益，只係抽水開玩笑，唔會道歉，因為有損尊嚴，佢（袁嘉敏）應該澄清番同道歉，佢依家屈我。」