傳狂蝕錢陷破產危機 汪小菲開Live爆喊嗌慘

汪小菲開Live時自爆有破產危機

台灣女星大S(徐熙媛)前夫汪小菲感情生活備受關注,當中佢同網紅張穎穎離離合合,撲朔迷離嘅愛情,原來都唔及佢嘅生意升幅咁吸睛。早前佢媽咪張蘭就大爆個仔旗下4間位於上海嘅店舖已關門大吉,仲話阿仔每個月損失至少200萬元人民幣(約246萬元港幣)。大家以為佢已經夠慘,點知尋日(7日)汪小菲竟然喺直播中聲淚俱下,感嘆目前北京分店嘅收入,根本唔夠畀人工,而廣州及上海分店亦已經連續蝕咗幾個月錢:「若是再不開門營業,下個月馬上宣布破產,再也無力堅持。」網上更傳出汪小菲投資成1億開咗3間店依家都變賠本買賣。

面對種種傳聞,汪小菲尋晚深夜即急急發文澄清,否認餐飲店經營慘淡一事,並透露疫情好轉解封後,自己仲有5間店要開業:「本來真不想解釋,但是傷害到我們的企業,同事,我們的努力。現在公司線上的銷售和外賣已經遠遠超過線下店的營收,我們是一個食品公司並不僅是一個線下連鎖店。我們的成功是有目共睹的,我們會更努力。明天外賣正常啊,解封後還有五家店要開業。自媒體年代,造謠成本太低,維權太難。既然我們改變不了環境,就努力改變自己,調整方向。我們一定堅定做好實業,我相信我們的未來,一切都是暫時的,我們也會一直努力前行。謝謝大家。」不過有網友就質疑佢死撐,因為本身專心工作嘅佢,自離婚後就頻頻開Live賣貨,由富二代降做KOL拉客,今次佢哽咽嗌慘有圖有真相,加上上次張蘭嘅爆料,令網友堅信佢生意唔多掂,叫佢出力諗吓點挽救事業好過!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能