雅虎香港新聞 傳謝安琪惹廣告商不滿 連累公司損7位數字兼有人被炒魷魚
近日有指謝安琪（Kay）同老闆麥浚龍（Juno）關係破裂，Kay更令公司損失7位數字廣告代言收入。謝安琪同老闆麥浚龍合作三年，關係一直都唔錯，二人合作嘅專輯亦有好成績，但早前傳出兩人不和消息，Kay於網上演唱會率先唱出新歌《三生一吻》，但此舉事前無同Juno溝通，有傳Juno因為咁樣而不滿，其後有人發現Kay嘅IG取消關注Juno。最近再有傳媒報導兩人關係緊張，原因係年初公司幫Kay接咗廣告商7位數字酬勞，擔任纖體修身代言人，但有指因為Kay修身成效未如理想，令廣告拍攝一拖再拖。
報導指Kay冇用過廣告商啲產品，而且IG仲有張健身教練幫佢操肌嘅相，廣告商見到就嬲咗，覺得佢並無履行合約精神，亦唔尊重品牌。報導續指，佢哋叫Kay提供近照俾佢哋跟進減肥進度，不過Kay唔合作唔畀相，搞到拍攝時間一再推遲，最終令廣告商不滿，決定中止合作。有指因為呢件事，Kay令公司損失7位數字代言費，而廣告商大老闆覺得marketing team做嘢有問題，於是炒晒成班人，真係一次過連累兩邊。
Kay發言人就指因為疫情及種種原因，同纖體廣告商在有共識下已經中止合作。
