元奎逝世︳七小福近況各異 元彪撞樣任賢齊？邊個仲拍緊戲 邊個已經退隱？

成龍喺微博上一則發文提到「我們一起緬懷已經離開的師父、師母、于素秋師姐、元麟、元音、元茹、元奎、元蓉等兄弟姐妹。」，令外界驚覺原來曾任導演、武術指導及監製嘅七小福成員元奎離世。有傳媒向香港電影工作者聯會主席田啟文求證，田證實元奎2年前因新冠病毒而逝世，但家人選擇低調處理而不公開。

著名京劇武生于占元師傅喺1960年代成立「香港中國戲劇學院」並在港收徒，于師傅喺一次京劇表演中，揀選洪金寶（元龍）、成龍（元樓）、元彪、元奎、元華、元武及元泰七人擔任《七小福》的主角，七名小將因此成名，日後亦以「七小福」之名組成戲班。元家班成立65年，七小福亦由小孩步入暮年，有人繼續幕前演出，有人就過住退休生活。

身為大哥嘅洪金寶今年72歲，近年不時被拍到要以輪椅代步，更一度暴瘦，但精神仍然唔錯聲如洪鐘，更批評網民話成龍滿頭白髮顯得蒼老，出言力撐師弟。早前票房破紀錄嘅《九龍城寨之圍城》入面，洪金寶飾演霸氣大老闆，依然打得兩手。

同三毛大哥一樣蜚聲國際嘅成龍今年4月步入70歲，被拍得滿頭白髮之後佢嘅粉絲團發文指成龍大哥係為角色需要而染白頭髮。而成龍大哥近年仍然活躍影壇，不時都有新作推出，多數喺內地工作。

堪稱七小福之中顏值最高嘅元彪，曾經喺日本人氣高企，多少因為外表似日本偶像。元彪90年代一度移居加拿大，近年重返幕前主力拍內地網絡電影。早前有網民喺香港一間酒店撞見元彪，有人竟然以為佢係任賢齊，亦有人認為元彪發福不少。

元華喺影視圈耕耘多年，1996年加入TVB後形象更為入屋。近年元華減少幕前演出，並移居加拿大含飴弄孫，最近一次露面係今年初出席TVB《萬千星輝頒獎典禮2023》，同朱咪咪一齊頒發最佳男配角獎，風采依然。而另外2位七小福成員元武及元泰甚少出現幕前而且作風低調，元武對上一次公開露面係喺2021年參與洪金寶率領七小福成員共同拍攝電影《七小福》嘅發佈會。而元泰就早已淡出幕前。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！