張繼聰承認同蔡卓妍成「硬闖拍攝」當事人 表態「任何硬闖都唔應該」

徐天佑太太Olive喺中環開設嘅護膚品店I Never Use Foundation（INUF），前日喺官方IG聲稱喺未批准之下，被本地一套賀歲片嘅劇組硬闖店內拍攝，更直言「同強姦冇分別」。涉及事件嘅本地製作有限公司以「認為單方陳述恐怕未能還原事實真相」為由發聲明，而INUF亦隨即回應反駁。

根據消息指，「本地製作」正拍攝由《喜愛夜蒲》監製伍健雄執導嘅賀歲片，以賭博為題材，男女主角係張繼聰同阿Sa 蔡卓妍。涉嫌捲入事件嘅張繼聰尋晚出席主演新片《裡應外合》嘅首映禮，當然被問到「硬闖事件」，阿聰承認當日拍攝嘅戲份就係佢同阿Sa 有份，但就認為自己身份尷尬，「成件事我唔可以評論太多，因為我仲要繼續拍，而舖頭都係我朋友嘅」。

張繼聰憶述當日係第一日為該電影開工，心情緊張，同阿Sa及導演討論劇本及拍攝事宜。到埋位時，張繼聰話有同店員打招呼，成個過程大約十分鐘，而個鏡頭係影住佢同阿Sa由店內行出嚟，之後就喺店外拍攝其餘戲份，阿聰去到當晚先知INUF出post提及事件。張繼聰回應記者時指INUF店員冇同佢地要求合照，亦唔知INUF店內有客人。

提及「硬闖」事件時，張繼聰表情都幾嚴肅，而佢就話「任何拍攝嘅硬闖都唔應該……作為一個演員，我好難去問電影公司『係咪硬闖？』。拍嗰一刻我冇懷疑，亦都冇問，因為……通常演員唔會下下問『呢度行唔行得』。」張繼聰形容自己「夾喺中間」，因為「套戲佢拍咗一日，另外嗰邊都係我朋友，我亦唔了解成件事」。阿聰坦言「既然唔得，咁咪唔好入去拍囉。係咪有人處理得唔好，咁咪叫處理得唔好嘅人處理返囉。」

張繼聰指事後與天佑有傳訊息溝通，但呢件事唔能夠僅靠佢地理解就解決到。阿聰直認心情有少少受事件影響，「作為一個演員，呢件事唔容易嘅，如果你係我，遇到呢啲情況，之後點呢？仲有咁多日拍，都係要繼續畀心機拍……幾難行都繼續拍啦」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！