內地拍戲中暑碌落樓梯 洪卓立昏迷10分鐘 嘔白泡一度危殆

·2 分鐘文章
洪卓立在新片首演奸角,事前刻意節食,最終出事。
洪卓立在新片首演奸角,事前刻意節食,最終出事。

英皇藝人洪卓立在內地拍戲期間,因中暑而碌落樓梯昏迷,口吐白沫兼抽搐,一度缺氧命危,幸送院後恢復知覺,現已返港休養。

洪卓立(Ken)上月底在內地順德與謝天華拍電影,站在木箱上的他突然暈倒,整個人向後跌,碌落樓梯再墮地,當場昏迷10分鐘,更出現全身抽搐及嘔白泡等疑似癲癇症狀,救護人員到場後即時為他急救,抵達醫院後他恢復知覺,但神志模糊、癱瘓床上四肢冰冷呈蒼白,指甲更逐漸發黑變瘀。

左膊着地「不舉」

事後Ken對出事經過完全「斷片」,最後記憶是正進行拍攝,醒來後已躺在救護車上,全身疼痛、頭暈兼嘔吐,直至送院吊鹽水及注射藥物後,情況才得以好轉。據知他已返港在家休養,並到醫院進行全身檢查,英皇發言人說:「佢一度昏迷,而且缺氧,已進行腦部掃描,一切正常,大家可以放心。」

Ken昨日透過聲帶報平安:「唔好意思令大家擔心,我冇乜事,只係左邊膊頭先着地,左手唔係好舉得起,希望快啲好番。件事令我有開心有唔開心,唔開心係令大家擔心,媽咪、助手,特別係導演,由我墮地暈低到送院成個過程都見證住。佢不斷支持我,同我講『冇事嘅!撐住呀兄弟!』,成晚喺醫院陪我。我會盡快好番,變番靚靚仔仔返嚟。」

他又在社交網分享心路經歷,並上載拍戲期間拍到的「日冕」照片,稱對人生有新的體會及領悟。2009年他因肺積水及爆肺而一度傳出危殆,多年來經常被傳死訊,正所謂「大難不死必有後福」,他寫道:「未來日子,活在當下,更要珍惜。」近年其演藝事業大躍進,手上的電影及劇集劇組都很支持他,願意押後拍攝檔期,更加重了他的戲份:「第1次做奸角,諗住做個好弗嘅大魔頭,之前係食得好少嘢,加上戲服、燈光等等,搞到嗰日『爆咗』中暑,依家已經食番多啲嘢。」並表示回復精神後,會慢慢做運動作準備,希望盡快歸隊拍攝。

面無血色:一度缺氧的洪卓立送院時全身蒼白,十分嚇人!
面無血色:一度缺氧的洪卓立送院時全身蒼白,十分嚇人!