全城競猜︱翁子光揭K先生慷慨借100萬開戲

最近古天樂同郭富城成為全城競猜人物，因為導演翁子光監製及投資電影《正義迴廊》時，因搵唔到投資者而四圍撲水，翁子光前日（7日）喺社交網發出千字文，指諗住將本來用嚟買樓嘅積蓄投資新片，不過票房最少要達2千萬先勉強夠回本，好在最後佢都搵到幾位願意借錢畀佢開拍此片嘅人，其中佢以「K先生」形容一位圈中人爽快借出100萬：「我膽粗粗打電話問了K先生，他對我一直錯愛，今次我就老實不客氣，開口就要借一百萬，佢電話裏只是說了兩句：『聽日過數。』和『不用多謝我也不用提我，努力為香港拍一部好戲』。」

此文一出，即令全城競猜位白武士係邊個，有人估係古天樂或郭富城，因為二人姓氏都係K開頭。翁子光尋日（8日）再揭多個提示，指自己不曾同呢位圈中人合作，而且對方本身有投資開電影，更直言對方講嘢咁簡潔，令答案更加呼之欲出，指向令人聯想到古天樂。