家族榮耀之繼承者｜首條宣傳片釋出 17名主演演員全面曝光

2022年劇集《家族榮耀》因勾心鬥角劇情及實力派演員演技大鬥法，成功吸引唔少觀眾收睇，劇組去年落實開拍續集《家族榮耀之繼承者》，劇集即將喺TVB播出，而日前（4月30日）亦播出首條宣傳片，17名主演大頭喺片中全面曝光，各人各懷鬼胎，再加上配以「豪門上流全員惡鬥」及「家人即地獄」等字句，相信播出時將會掀起一陣煲劇熱潮。

以豪門家族為題材嘅《家族榮耀之繼承者》由寰亞傳媒、優酷聯合出品，為《家族榮耀》延續之作，不過劇情與前作並無關係，故事由丘氏集團繼承者身份嘅爭奪展開，丘家孫女丘皓兒（佘詩曼飾）向來於家中不得勢，爭強好勝，認為自己有當繼承者嘅能力，不過集團創辦人丘家老太爺重男輕女。某日，丘老爺突然病重並留下一封委託丘皓兒全權代理集團主席工作嘅委託書，家中眾人對此感到質疑與阻撓，律師林峯力證委託書真實性，令佘詩曼成功接下代理主席一職；後來，丘老爺突然離世，留下一錘定音嘅遺書，令家族再次陷入爭鬥之中。

除咗劇情吸引，演出陣容亦極強大，首條宣傳片已經將17名主演演員大頭全面曝光，包括佘詩曼、林峯、羅子溢（前名：羅仲謙）、羅嘉良、梁靖琪、劉江、許紹雄、余安安、張鳳妮、龔慈恩、黃浩然、吳岱融、劉浩龍，陳靜、陳瀅、王敏奕、梁諾妍；今次亦係佘詩曼與林峯呢對最強CP相隔9年再合作，亦係第六度合作。

另外，久未於TVB出演新劇嘅羅嘉良喺較早前釋出一段幕後花絮中，佢以白髮造型亮相加上勁大個眼袋，顯得個樣好殘，老態盡現，被指當年男神崩壞，甚至仲殘過同劇76歲劉江及74歲許紹雄。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！