【全民造星3】出局賴死唔走 葉小妍被爆有疑似不雅影片流出

VIU TV節目《全民造星III》繼續播出第一輪淘汰演出嘅片段。雖然今季參加者都係已出道藝人，但係五音不全、動作騎呢者大有人在，而且評判尺度一時一樣，睇到人硬晒呀……個拳頭！

前晚節目尾聲，播出參加者葉小妍嘅部份片段，見到佢嘅打扮同應對都令觀眾深知「出事」，但係製作組將呢段留為伏筆，到尋晚一開show就睇到自稱「魔樂師」嘅驚人演出。

最令人O咀一幕係音樂一響起，葉小妍就叫停，話有個魔術想喺唱歌前表演……點知幾下手勢之後，只係變出一塊彈結他用嘅pick，全世界都滴晒汗。而葉小妍表現嘅自彈自唱，選曲係Avril Lavigne 嘅My Happy Ending，但係表現奇差，三位評判冇人俾藍燈等佢過關，要即時出局。

31歲嘅葉小妍居然賴死唔肯離開舞台，又喊住求情，咁反而立即辣著評判卓韻芝，拎晒頭話「唔好啦」！最後要由花姐將情緒崩潰嘅小妍送走。

睇返資料，葉小妍雖則無咩表現，但係個人IG帳戶都有8千幾個追隨者。佢曾經喺港台兒童節目《Harry哥哥快樂農莊》演出，著住超短裙同露出事業線嘅戲服喺小朋友面前表演魔術，真係深明搶鏡之道。

而網上亦有一段疑似係葉小妍嘅不雅「自摸」影片流出，片中人造型同佢相當似，但係片段前後又有小妍嘅演出片段，會唔會係自己「有意」唔小心流出呢？