【全民造星3】爭入十強 顧定軒出局 NY靠舞台魅力揮低右雨

《全民造星III》尋晚開始進入20強淘汰賽，以自選表現項目1對1嘅形式進行，唔再分組對決，而係抽籤決定對戰陣容。操生殺大權嘅5位評判分別係陳柏宇、鄭欣宜、火火、林曉峰及劇場創作人黃詠詩。

巧合地尋晚播放嘅2場對決，都係由同組選手互撼，簡直係友情大考驗。

第一round由A組嘅顧定軒（Zeno）對Mischa（葉巧琳）。得知對手係Mischa之後顧定軒睇嚟若有所失，旁白就提到因為綵排過後大家都認為Mischa嘅演出超水準。而喺側寫參加者部份，監製花姐認為演員出身嘅顧定軒理應搶鏡，但係「見唔到佢」，而幾個月嘅比賽過程亦未能改變顧定軒內歛性格。於是顧定軒選唱《自畫像》以表達尋找自我過程。

至於被睇高一線嘅Mischa都唔係十拿九穩，因為出道多年嘅佢一度失去演出嘅熱情，直至上一回合4個令佢喜歡嘅演出先重拾感覺，佢決定選唱音樂劇歌曲She Used to be Mine / Maybe this time出戰。

比賽時，顧定軒嘅演出感情豐富，但係間中音準不穩，評判之一欣宜就表示「第一句就聽唔到你唱咩」。而Mischa嘅表演就充滿自信，能夠駕馭歌曲嘅起伏，5位評判一致好評，火火甚至話如果係宴會上聽到呢段歌聲，佢會放低酒杯同刀叉，尊重呢位表演者。

結果Mischa毫無懸念地以5盞藍燈勝出呢回合，殺入決賽。

第二Round賽事有右雨同NY對決，佢地之前幾個回合都係同一小組成員，感情唔錯。而兩個人揀嘅表演都係跳唱，不過歌唱水準上都有問題，右雨唔夠力而NY就音準有偏差。右雨嘅表演未能懾住評判眼球，火火話自己嘅注意力反而去咗其他舞者，欣宜就嫌出場嗰下欠缺氣勢。相反表演時由鐵籠爬出嚟嘅NY，一度唱到埋評判桌，結尾又披上霸氣大衣，十分架勢，順理成章獲得評判一致挑選，順利入十強。

片尾預告咗今晚會有方方、Manson、Kimman同Alina出場，睇落斯文嘅Kimman似乎仲會有聲嘶力竭嘅演出。如果根據早前網路流傳嘅十強名單，Kimman同Alina都會入圍，究竟係咪真？