其實……梁振英係臥～～底！

田少最近接受報章訪問，指若然梁振英再連任，香港會比佢累死。我不以為然。

由2012年選特首開始，諗落其實梁振英好可能係臥底，分分鐘香港起死回生都係靠佢。


你諗吓，唔係梁振英，你係唔會知道一個當初口口聲聲話隱瞞僭建係誠信問題嘅特首候選人，其實自己屋企都有僭建，簡直係Mind Blown！佢講得出：「記憶中，我無講過我無僭建。」，就證明佢一早預咗自己會被揭發，但為咗逆轉民意做特首，幾不知廉恥嘅嘢都講得出。呢次係香港人第一次見識到，官，原來係可以咁無恥。（當然自此之後，大家就習以為常，並不驚訝啦。）

之後佢一意孤行要推國民教育。多得梁振英，我哋先發明咗個「香港人集體放工節目」—— 去金鐘集會。如果唔係佢，邊會集結到幾十萬人嘅力量，嬲到晚晚放工約埋三五知己要去金鐘野餐，持續個幾星期，迫使政府9月8日開記者會放棄強推國民教育。之後因為一男子引起嘅發牌風波，乃至雨傘革命，某程度上都係沿用咗呢個金鐘集會嘅模式，先會演變成後來呢場改變好多香港人（同時亦未能改變好多其他人）嘅社運。

唔係梁振英，大家亦唔會醒覺「香港，勝在有ICAC」，大嗱嗱收咗UGL五千萬都可以無事過到骨，唔係你點知做官其實真係好過去搶，起碼保證唔洗比人拉。

唔係梁振英明恰港大學生上心口，係都唔比陳文敏做副校，仲要欽點全校上下都明確反對嘅沙皇李國章做校委會主席，亦唔會辣著港大咁多老鬼、學生，有史上第一次嘅港大畢業生議會特別會議。

仲有咩西九漏報利益發展局局長囤地水貨客警權過大鉛水三跑郊野公園起樓銅鑼灣書店一帶一路魚蛋革命……等等等等，梁振英嘅功勞，完全係罄竹難書。


自當選特首近四年嚟，香港人身分認同持續加強，本土意識抬頭。所謂先置諸死地而後生，梁振英搞到香港污煙瘴氣，瞓著嘅人都醒晒（裝睡的人叫唔醒，另當別論），我有乜辦法唔以為佢係臥～～～～底？！如果佢真係厚面皮到夠薑連任嘅，我相信香港人亦唔會放軟手腳同佢客氣，即管放馬過嚟。

************************************

（原文刊於輔仁媒體）

facebook專頁： b612lpp

instagram：b612lpp

tumblr：b612lpp

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」