刑偵日記︱戴祖儀崩潰戲獲讚 視角色為轉捩點：唔好記住嬉皮笑臉嘅我

26歲「宅男女神」戴祖儀（Joey）備受TVB重用，出道短短3年就已經喺《娛樂大家》、《學是學非》等綜藝節目成為重要一員。近日又喺熱播劇集《刑偵日記》飾演「葉朗晴」一角，即使拍住大前輩惠英紅與王浩信亦毫無怯場，更被網民狂讚。

戴祖儀演出經歷唔多，只係喺2019年播出嘅《多功能老婆》演過長腿Miss，劇中亦無太大發揮空間；而今次戴祖儀就係《刑偵日記》中演繹創傷後遺症病人，佢直言角色同自己性格好唔同，需要成日痛哭，相當考演技。戴祖儀回想被兇手襲擊情境爆喊一幕，網民就話對佢另眼相看，留言指：「演技大爆發」、「竟然唔記得咗平時綜藝攪笑嘅戴祖儀」、「今年一定攞硬飛躍進步女藝員」、「瘋得好真，從此定位做御用癲婆」等等。不過，戴祖儀就透露呢場戲要短時間內由崩潰轉到冷靜，難度好高，拍攝前緊張到去咗好多次廁所。

日前，戴祖儀更加喺IG分享Casting片段，指「葉朗晴」一角係自己好重要嘅機會，更加係一個轉捩點：「我好想俾大家知道，我都可以認真，可以做戲，可以不停挑戰自己。我真係真係好想得到這個角色。做咗好多資料蒐集，這就是我創造的葉朗晴。我知道未完美，但我很興幸，最後我得到了這個角色，可以繼續創造下去，繼續完成這個角色！」 又向傳媒表示希望用演技演好畀大家睇：「唔好記住一個嬉皮笑臉嘅戴祖儀，記得我係一個會做戲嘅戴祖儀。」戴祖儀今次嘅演繹成功突破自己，而佢早前亦完成劇集《青春不要臉》女主角拍攝，未知遲啲播出時又會唔會帶嚟驚喜？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！