初秋甜蜜蜜!10月份下午茶提案

·4 分鐘文章

踏入初秋,係開始想慵懶嘅日子,約朋友出街去嘆返個下午茶就最啱啦~今期包括韓國香印提子主題、幸運星座主題、充滿秋日氣氛嘅松露主題及粉紅愛心主題,款款都咁有gimmick,即刻睇下邊間啱心水!

秋色松露下午茶 樂聚廊 

松露控留意!呢間餐廳推出秋色松露下午茶,由曾於西班牙同日本米芝蓮星級餐廳工作多年嘅年輕糕餅總廚David Puig Zaragoza主理~其中一件最吸睛嘅甜品係西班牙黑松露巴斯克焦香芝士蛋糕,蛋糕除咗濃郁芝士味,更帶有淡淡焦香同黑松露味,味覺好豐富。另外仲有糖漬甘栗搭配法式泡芺同雲呢拿忌廉、烤焦糖肉桂蘋果,伴以焦糖酥皮及香緹鮮奶油等甜品~鹹點方面推介羊奶芝士伴焦糖迷你梨,奶味羶香幾有驚喜。

秋色松露下午茶
秋色松露下午茶

供應日期: 即日起至11月21日

供應時間:
即日起至10月31日: 下午3時至5時30分(星期一至五) | 下午3時30分至5時30分(星期六及日)
10月31日至11月21日: 下午3時至5時30分(星期一至五 | 下午2時至3時30分或下午4時至5時30分(星期六及日)

價錢: $348/位,$548/兩位

幸運星座下午茶 Uptop Bistro and Bar 

唔少人都會相信星座運勢,如果你都係星座迷,一定唔可以錯過呢個「幸運星座」下午茶!Afternoon Tea以各個星座嘅專屬幸運食物作賣點,一共12款鹹、甜點,再加上星座輪盤同迷你星座玻璃球擺設,配埋維港景色真係享受。就好似天秤座嘅幸運食物係黑芝麻,廚師團隊特意為天秤座設計咗黑芝麻芝士蛋糕,黑芝麻配上濃厚芝士,兩者加埋香濃而不膩;而巨蟹座嘅幸運食物係蘑菇,呢個鮑魚蘑菇酥皮盒以原隻鮮甜彈牙嘅鮑魚搭配鬆化嘅酥盒,食落有淡淡蘑菇香氣,又幾清新。

幸運星座下午茶
幸運星座下午茶

價錢: 星期一至五 $428/兩位、星期六、日及公眾假期 $468/兩位

餐飲券: 2人酒店下午茶 -[幸運星座]主題下午茶 (星期一至五)78折
餐飲券: 2人酒店下午茶 珀薈酒店「閃亮摩天輪」主題下午茶 (2人用) (星期一至五)78折

粉紅愛心下午茶 廷廊 

食下午茶都可以做善事㗎~呢間酒店餐廳連續第四年同香港乳癌基金會合作,推出粉紅愛心下午茶,每賣出一份就會捐出港幣$25!下午茶以高貴嘅Wedgwood茶具及傳統英式下午茶三層架襯托,啱晒相機食先~甜品方面包括香甜鬆軟嘅香桃法式泡芺、口感清新嘅石榴忌廉杯及甜而不膩嘅粉紅乳酪士多啤梨雪條等;而鹹點就有蟹肉三文魚三文治、粉紅蝦沙律及香橙鵝肝夾心,無論視覺及味覺都令人驚喜。

粉紅愛心下午茶
粉紅愛心下午茶

供應日期: 2021年10月1日至11月30日

供應時間: 逢星期一至五於下午3時至5時30分供應,逢周末及公眾假期則於兩個時段供應,分別是下午2時15分至4時15分及下午4時30分至6時30分。

價錢: $398/位,$688/兩位

訂座同時訂餐優惠:(2人用)「粉紅愛心」下午茶(2人用)「粉紅愛心」下午茶 (任飲Saicho氣泡茶/配兩杯Tattinger香檳)

韓國香印提子下午茶 沙田凱悅酒店咖啡廳

知大家去唔到旅行,呢間酒店同aT韓國農水產食品流通公社合作,推出「韓國香印提子下午茶‧ 本地遊」!選用來自韓國慶尚北道產頂級姬香公主香印提子製成多款鹹點、甜品同特飲,如香印提子香檳慕絲,以韓國香印提子、香檳同乳酪製成幼滑慕絲,集齊果香同酒香~鹹點方面焗香印提子鮮蝦接骨木花忌廉撻又幾有特色,鹹甜嘅配搭令人愈食愈開胃!

韓國香印提子下午茶
韓國香印提子下午茶

供應日期: 2021年10月8日至2021年12月8日

供應時間: 下午3時至5時

價錢: $468/ 2人用

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能