利穎怡遭粗暴男狠飛諗過自殺

初戀總是刻骨銘心，但對「東張」女神利穎怡來說卻是傷心回憶！她自爆被首任男友狠撇後，一度想過尋死，需看心理醫生以及朋友輪流陪伴開解治情傷。

現年32歲的利穎怡憑主持無綫節目《東張西望》深得網民喜歡，雖然貴為「女神」，但戀愛經驗只得兩次，還直言初戀回憶不是「無限美」，而是一次重傷：「可能我以前比較唔成熟，初戀男友又有少少暴力傾向，記得喺拍拖後期係分隔兩地，佢試過因為我去街冇話畀佢聽，發現咗後就喺視像問我，嬲到想用櫈掟埋個Mon度，嗰次我真係好驚，但都冇諗過要分手！直至有一日，佢同我講想分手，因為想去睇醫生控制好自己情緒先再搵我，點知唔夠幾日佢就有新女友……我當時好唔開心，唔明白點解佢要咁樣呃我。」

搞首飾品牌告吹

被初戀男友狠撇，利穎怡當時傷心至極，一度諗過做傻事：「嗰陣真係傷心到唔食、唔瞓，仲好傻咁諗過自殺！我嘅好朋友輪住陪我，喊咗唔知幾多晚，當時唔止有情緒病要睇心理醫生，身體仲出現問題，皮膚會出水。（即係有皮膚病？）係！花咗好耐時間先至慢慢好番。」

愛情失意，連事業也遇挫折，利穎怡去年與林泳淘、尹詩沛公布合作搞首飾品牌，怎料籌備近一年，最近因種種原因而告吹，投資金錢與設計好的60款首飾全部化為烏有，她坦言可惜：「不過都慶幸及時有呢個決定，因為依家市況真係好難做！我哋三個合作期間都有少少爭執，唔想做落去連朋友都冇得做，依家仲係好好嘅朋友。」

另外，利穎怡早前為一位被騙財產的92歲漁塘主人根叔，尋找律師團隊義助，令對方再見曙光，因而獲不少網友讚是「正義女神」。對於又多一個「女神」稱號，她謙稱：「好多謝大家嘅誇獎，女神唔敢當亦都配唔起，但依家呢個稱呼都好似係女士嘅專稱，所以都冇咁大壓力。」