前度男友疑似警署「約炮」袁澧林IG被網民洗版

近期警民關係緊張，尋日有社交網站爆料有警員被發現喺交友Apps識女仔。本來識下女仔好平常，但佢大膽地疑似約女仔到所屬嘅深水埗警署「開房」，當中二人不雅聊天記錄亦相繼流出，對話仲相當露骨。

當網民再進一步起底時，竟然發現「文青女神」袁澧林（Angela）同該警員竟然喺大學時期拍過拖，搞到唔少網民轟炸袁澧林嘅社交平台，更留言鬧：「袁小姐 知唔知啲人要入嚟攻擊你？係因為你冇為香港出過聲啊 早兩年香港人都好鍾意你 捧紅左你之後你就翻大陸搵錢！今次反送中事件你冇表過態啊 你當年仲上過浸大學生會㗎！14年你都出嚟幫手 依加呢？你忘恩負義 你屋企有事你都唔出聲啊怕搵唔到錢 你咁樣叫我哋點同情你點幫得你落啊！」、「對你好失望」、「可以專心番大陸拍劇，唔洗再番黎👋🏻」等等。

亦有網民認為唔關Angela事，留言話：「只不過係前度，仲要係讀書嗰陣，關袁小姐咩事呢？人生流流長，總會遇上一兩個人渣。唔好對無辜者踩多兩腳。」、「都唔關佢事，唔好做多左😕」及「啲嘢完全唔關妳事，咩都唔使理，做好自己，加油呀」等等。

而袁澧林經理人馬上回覆傳媒表示兩人係拍過拖，不過時間好短暫，而家已經冇聯絡。