雅虎香港新聞 前空姐拍片爆龔嘉欣為事業棄做少奶奶 張振朗乞人憎見高拜見低踩
早前國泰航空大裁員，前空姐「阿SA」就轉型做Youtuber大爆航空界秘聞，繼講最喜愛及最討厭明星乘客後，噚日佢再拍片講娛樂圈秘聞，今次就係講喺《萬千星輝頒獎典禮2020》嘅得獎者張振朗及龔嘉欣。
張振朗憑《反黑路人甲》高彬一角獲頒「最受歡迎電視男角色」，喺講得獎感言時就話：「多謝我屋企人嘅教導就係一定要識尊重別人，別人先識尊重你」。呢句說話令阿SA要爆啦！佢就話身邊有一個朋友喺片場做咗臨時演員多年，阿SA就問佢有冇邊位演員特別乞人憎，朋友諗咗一陣就回答「張生」喺度扮大哥，見高拜見低踩。之後，阿SA仲話佢有多謝屋企人同埋佢隻狗，不過就冇多謝女朋友。另外，佢仲話黎耀祥真係好好人，當年攞視帝時連隔籬廠嘅清潔工都過去祝賀佢，最後仲叫「張生」學下嘢，要人尊重係要一視同仁。
而龔嘉欣就憑《香港愛情故事》邱凱琪一角獲頒「最受歡迎電視女角色」，阿SA除咗恭喜及大讚佢喺《殺手》搏命及好戲之外，仲話聽一名馬來西亞籍嘅空姐朋友講龔嘉欣為事業放棄愛情，話龔嘉欣原本有一個好錫佢嘅有錢大馬男友，啲錢任佢使，對方仲打本俾佢開火鍋店。阿SA仲話聽大馬朋友講啲豪門已經收到佢哋嘅婚訊，不過龔嘉欣對演員有一份執著，所以選擇放棄做少奶奶。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
