劉德華同囡囡劉向蕙現身西環茶餐廳 兩個舉動為保護愛女被讚好Sweet

早排陳奕迅喺茶餐廳開餐，雖然係天王巨星但係都要搭枱，食客驚見同Eason同枱食飯當堂好驚喜，但係Eason就叫網民細聲啲並且婉拒合照。

要見明星，茶餐廳可能係好地方。梁思浩主持嘅YOUTUBE節目《娛樂好好玩》日前就提起，有朋友喺茶記撞見劉德華父女！

思浩憶述有朋友喺西環一間茶餐廳食嘢時，見到劉德華同囡囡劉向蕙一齊行入茶餐廳，令思浩友人相當驚訝，甚至想大嗌。華仔見狀就將一隻手指放喺嘴上示意低調啲，費事驚動到人。據思浩所講，原來劉向蕙突然人有三急，於是劉德華停車問茶餐廳借廁所，華仔仲企喺廁所門口等囡囡。

梁思浩提到，佢朋友搵劉德華合照，華仔話可以，「但唔好咁大聲，驚嚇親個女」，合照完就細聲著思浩友人返埋位。然後向蕙去完廁所，華仔就同個女上返車。梁思浩同主持之一嘅江美儀都大讚華仔此舉好sweet。

劉德華同多年女友朱麗蒨2008年結婚，2012年終於榮升父母。二人愛女劉向蕙今年12歲，現時就讀於滬江維多利亞學校，學校中學班級學費每年超過16萬。去年劉德華爸爸劉禮逝世，劉向蕙現身喪禮，被拍到已經亭亭玉立。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！