劉晨芝美國探疫境 險遭踢落車!

東方日報
·2 分鐘文章
劉晨芝終於「放監」,可以返屋企休息!
劉晨芝終於「放監」,可以返屋企休息!

藝人劉晨芝前往疫情嚴峻的美國為無綫拍攝新節目,她自爆在當地坐出租車時因華人身份被歧視,幾乎被踢落車!

新冠肺炎肆虐全球,疫情影響下各地市面變得蕭條,劉晨芝(Adrienne)早前返美國探望家人時,就為無綫節目《再見2020 你還好嗎》探疫境,拍攝當地市面情況。

當地有歧視華人的情況,Adrienne遇上白人司機拒載,搞到一肚氣:「佢見到我係華人話唔載,但係我趕去機場夾硬上車,途中司機不停話要放低我,落車後又完全唔掂我啲行李,覺得我係播毒者!當時好無奈,又唔可以打佢、鬧佢!其實朋友覺得呢種情況我唔應該上車,因為佢咁憎我,好危險!」

做阿四幫手搶廁紙

雖然疫情嚴重,但她因為擔心已移民的家人,所以今年已是第3次前往當地,更因利乘便為無綫拍節目,她苦笑:「計番返港隔離時間,夾埋已經個半月,真係人都癲!今日我完成隔離出酒店門口,真係有種重見天日嘅感覺!」其實此行她只逗留了個多星期,期間為媽咪慶生,又為家人外出搶廁紙,名副其實做「阿四」!

賭城冷清變空城

最令她心酸的是去拉斯維加斯拍攝時,過往繁華之地慘變「空城」:「未見過咁慘,1個人都冇,賭場雖然有開,但入面有膠板隔住啲客。(當地居民面對疫境嘅心態係點?)外國人冇乜戴口罩,佢哋覺得冇用,華人就守規矩嘅,都好無奈,情況比香港更慘。(商店全部閂晒?)係,餐廳開嘅都只做外賣,好彩大部分美國人有車,買上車開餐。」

一連7集的節目《你還好嗎》今晚播出,主持洪永城會帶領觀眾走訪世界各地,感受人民如何守望相助,「疫」境求生,松岡李那及余思霆等會作實地採訪。

劉晨芝此行去美國探親兼拍節目。
劉晨芝此行去美國探親兼拍節目。
余思霆節目中到台北耶誕城睇燈飾打卡。
余思霆節目中到台北耶誕城睇燈飾打卡。