勁食12日呻後悔!高海寧加料「童」星集氣鋪后路

高海寧疫情下愛上思考人生,坦言冇咁易開心。
高海寧疫情下愛上思考人生,坦言冇咁易開心。

藝人高海寧(高Ling)在新劇《童時愛上你》挑戰演只有8歲智商的女孩,贏得不俗口碑。一直與獎無緣的她,有網民集氣為她爭視后,她覺得有觀眾認可寧舍開心,無論有冇獎都會繼續努力。

《童》劇播映以來,不少途人直呼劇中名字「彤彤」,高Ling都會彤彤上身打招呼,她自覺本身就有小朋友性格,鍾意笑及帶點低能;又踢爆張振朗經常臨場爆肚改對白,幸好她接得到:「我哋唔係改劇情,係喺劇情發展下加啲搞笑,導演好鍾意,覺得最好睇係演員有發揮。有次導演叫我坐喺度演,我話彤彤唔會坐,一係瞓、蹺腳同食嘢。」又笑言自度了多場食嘢戲,開廠頭12日演彤彤不停食薯片、雪糕和花生醬,當中一場消夜戲,一個鏡頭便吃掉10隻煎餃,拍完12日戲竟肥了十幾磅,令她非常後悔,因為之後的女強人Amanda戲,衣服開始穿不下。

談及觀眾喜歡彤彤這個角色,力撐她攞視后,她開心說:「好呀!諗吓!好開心大家咁講,如果公司願意畀呢個肯定我,梗係開心啦!如果未係時候,我會繼續努力,得到觀眾認可寧舍開心。」她起初擔心演8歲女孩會作狀、扮可愛,又擔心演28歲時跟振朗似姊弟戀,幸好觀眾好代入:「甚至有人叫我唔好變番28歲,要Keep住8歲,好開心!」

疫情下心態有變

早前高Ling突然在社交網感慨不再可愛,令人擔心,她笑言自己還是可愛的,只是變得淡定:「疫情令我成長,我睇咗好多心理學書,冇嘢做時困喺屋企,情緒同心態上有啲轉變,諗人生乜嘢係必須,乜嘢可以斷捨離。我係冇以前咁易開心,以前我真係好似彤彤,基本上冇唔開心就係開心,依家如果遇到開心事就開心,係有差別。」

以前有事發生,她會第一時間致電爸爸求助,但在內地工作時,必須一個人面對,變得獨立和成熟。她感謝父母從小嚴厲管教,晚上6時後不能外出,故從未與朋友遊船河和唱K,以前覺得父母太嚴,現在則覺得教得好:「我兩個細佬都大學畢業,大細佬仲有雙學位,以前我照顧佢,依家佢幫我投資,佢知家姐係辛苦錢,所以好穩陣。」

高海寧暗藏童心一面,自信依然可愛。
高海寧暗藏童心一面,自信依然可愛。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能