北角社企中式糕點Café 金齡婦女「舊糕新造」

以為傳統港式糕點一定係老土？呢間以懷舊糕點為靈感嘅社企小店，可以顛覆大家嘅固有睇法。店舖出品嘅糕點，包括菲林卷、砵仔糕、叮叮糖等，唔單只賣相精緻又打卡，仲係出自多位金齡婦女嘅手𠻹～

「港式糕點唔係老土嘢」

香港近年興起懷舊復古風熱潮，而喺2021年創辦嘅「糕點時光」則主力保留傳統糕點文化，大膽糅合懷舊同玩味元素，令糕點以新穎形象示人。除咗早年開設糕點外賣舖，同埋不時進駐商場開Pop-up店外，最近又有新動向，今個月更首次開設中式糕點Café。

新店同品牌以往嘅店舖唔同，除咗新增堂食座位、打造成休閒空間外，餐牌亦注入唔少新派元素。負責人Celeste表示：「我哋一直主打嘅糕點都係走健康、養生路線，但好多客人反映食糕點都想有堂食位置，而香港成行成市都係西式Café同蛋糕店，我就有個想法，睇吓可以點樣將糕點延伸去其他餐點，或者配搭唔同飲品呢？希望大家對中式糕點有少少改觀，令大家覺得糕點唔係老土嘢，都可以係新潮嘢。」

金齡婦女「舊糕新造」

致力保留糕點文化嘅同時，Celeste亦留意到社會上有唔少家庭主婦或退休人士希望可以自力更生、重投社會，所以品牌專門聘請金齡婦女，為佢哋提供就業機會，唔少餐點都係佢哋嘅心機之作嚟㗎～茶室嘅主食目前以台式同港式口味為主打，如「五香梅菜扣肉刈包」由鬆軟台式刈包搭配港式家常菜；「藥膳醉雞腿拌麵」呼應品牌嘅健康養生理念等等。Celeste解釋菜單設計上，想貼近時下年輕人口味，造型亦會特意走精緻路線，滿足客人醫肚同時打卡嘅需求，仲有機會接觸到上一代人嘅甜品。

社企由糕點起家，新店當然都有佢嘅蹤影啦！不過單係一份糕點未必滿足到你，所以店主重新包裝甜品，以全新IG-able嘅造型登場。「我認為堂食相比單買，糕點嘅賣相同分量都唔同，加上想年輕化少少，所以新店嘅糕點賣相會改成精緻少少，畀客人可以打卡」。其中糖蔥餅擺脫既有賣相，比起店家早早包好送到手上，呢度以客人自行DIY動手包製為綽頭；而懷舊糕點拼盤可以一口氣嘆勻4款手工糕點，同朋友一齊share食啱晒！

其他菜式都有加入養生元素，仲好有造型感，如賣相可愛嘅玩味剝皮橘子包， 十足真實嘅水果橘子，輕輕搣開「橘子皮」會食到乳酪內餡，玩得又食得！另有糯米丸子艾草拿鐵、大理石黑芝麻牛乳、鐵觀音拿鐵等等，估唔到味道都幾夾㗎～

糕點時光
地址: 北角錦屏街26號幸福大樓地下D1號舖

文：Sharon
編：Cathy
相：Yan Yan