徐天佑太太護膚品店聲稱被賀歲片劇組硬闖拍攝 形容「同強姦其實冇分別」

早前有消息指，今年本地賀歲片喺八、九月仍未有著落，到十月先傳出2套新片落實開拍。由於距離大年初一只有3個月時間，製作進度相當趕忙。尋日，徐天佑太太Olive開設嘅護膚品店，喺官方IG聲稱被賀歲片劇組硬闖拍攝，更直言「同強姦冇分別」！

Olive創立嘅護膚品牌I Never Use Foundation（INUF）喺中環九如坊開設店鋪，INUF發文指，早前有電影公司想借場地拍攝賀歲片，INUF回覆話需要逐小時計租場費用，以及如果有任何損毁都必須由電影公司負責。電影公司就指「器材工作人員唔會入嚟，只係演員入嚟兜幾個圈好快就出返去」。INUF於是回應，咁拍同樣需要借用場地1小時收費，之後雙方再冇下文。

到尋日下晝，INUF職員發現有電影劇組人員喺店外拍攝，於是提醒拍攝隊伍唔可以進入店內，但後來有劇組人員突然走入INUF店內門邊放低對講機，再有兩位演員走入店內兜幾個圈，「個對講機突然勁大聲向演員發出指令，演員又好大聲咁講對白。大佬！我哋上面有兩位客人休息緊㗎！店內工作中嘅同事完全反應唔過來，之後佢哋又再次入嚟做同一樣嘅，有crew仲要話我哋同事影佢哋相」。

INUF嘅帖文直指成個過程只係短短10分鐘，「但呢10分鐘嘅『夾硬嚟』同強姦其實冇分別」，又認為今次拍攝係商業用途，「在商言商，就係要計數。我哋打開門做生意，每天交着高昂嘅租金人工水電媒，你哋請個臨記都要封番封利是啩？！」，「點解可以咁過分嘅？有冇禮貌㗎？有冇程序㗎？」，更指「難怪港產片每況愈下」。

帖文內同時提及捲入事件嘅係「本地製作有限公司」，而根據消息指，該公司正拍攝由《喜愛夜蒲》監製伍健雄執導嘅賀歲片，以賭博為題材，男女主角係張繼聰同阿Sa 蔡卓妍。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！