【《十二傳說》今首播】劉江自爆年輕時曾日夜顛倒拍劇引致中風

由蕭正楠、林夏薇、劉佩玥及張穎康等人主演嘅靈異劇集《十二傳說》將會喺今晚首播，劇集以香港都市傳說為題，故事由記者蕭正楠、民俗學教授林夏薇及警察張頴康，一齊調查香港發生嘅奇案奇事，例如有狐仙、西貢結界及新娘潭等等。而老戲骨演員劉江亦有份出現喺石獅成精殺人事件及榕樹精殺人事件中，大家唔好睇劉江好似好健康同好好中氣，佢自爆年輕時曾經因為成日日夜顛倒咁拍劇，捱壞身子而中過風。

72歲嘅劉江老師於1966年加入影壇，做演員前做過武術指導、電影配音，演員生涯亦從電影業到佳藝電視、轉投麗的電視 ，於1981年轉投無綫直到而家。多年來劉江拍攝多部經典劇集，例如《射鵰英雄傳》、《神鵰俠侶》、《紅樓夢》、《浮生六劫》及《大俠霍元甲》等等。拍劇忙到佢作息時間日夜顛倒，連屋企人都無時間見。直到1979年拍攝《人在江湖》時，劉江約老婆同囝囝去飲茶，點知行行下突然郁唔到，手又舉唔起要立刻送院，當時佢覺得人生就咁玩完。後來先知係腦血管栓塞中風，但佢當年只有33歲，覺得冇可能係中風，唔知自己做錯咩。而且囝囝仲係好細，佢唔可以有事，仲要照顧老婆同囝囝。最後佢憑住信念入院9日後痊癒，後來更將全部精力放晒囝囝身上努力賺錢供佢到英國讀書。

劉江老師已經到咗退休年齡，工作量開始減少，逐漸淡出幕前，所以要好好留意佢喺《十二傳說》嘅精湛演技啦！