午市$88！佐敦新開台式一人小火鍋店 必試老薑麻油雞鍋+牛乳美肌鍋

唔少人而家都鍾意食一人一鍋，貪佢可以揀自己鍾意嘅口味之餘又衛生啲～最近佐敦新開咗一間台式一人一鍋，有多達十二款湯底，湯膽用咗雞殼、豬皮及竹庶等慢火熬上至少八小時，有豐富嘅膠質而且味道清甜。有唔少鍋內嘅食材如丸類等都由台灣直送，所有火鍋劃一收費，午市$88晚市$115，包一個鍋、飯或麵及一杯飲品，亦可加錢添加配料，想念台灣味道嘅朋友可以去試吓！

台式麻辣鍋

麻辣鍋湯底先將豆瓣醬、花椒、辣椒、薑及洋葱等等炒香，又麻又濃郁。配料方面就有食麻辣鍋必備嘅鴨血以及牛肉、炸枝竹，台式蛋餃、芝士魚豆腐及索晒汁嘅蜂巢豆腐等！

美肌鍋（牛乳）

美肌鍋其實就係牛乳湯底，配料有養顏嘅花膠、鮮淮山、蟲草花、芝士竹輪及特級花枝丸等，健康又滋潤。

老薑麻油雞鍋

天氣仲係忽冷忽熱，想養吓身子呢個老薑麻油雞鍋好合適，麻油味香濃，薑味恰到好處，配埋台灣麵線食好夾！至於配料如爆汁牛丸、芋泥貢丸及有骨魚皮都幾有特色。

泡菜豚肉鍋

泡菜豚肉鍋其實就係韓式部隊鍋，湯底香辣惹味，配埋部隊鍋常見嘅配料及台式丸類等更豐富！

如果想體驗更多台灣風味，可以將白飯升級至滷肉飯，滷汁唔會過鹹，滷肉亦肥瘦均勻。

另外仲有台灣直送嘅小食呀，台式雞皮捲用雞皮包裹住雞肉高溫油炸，酥脆而且肉汁豐富；而麻辣臭豆腐真係一上枱就聞到個臭味，鍾意臭豆腐嘅朋友唔可以錯過！

十二鍋
地址: 佐敦彌敦道219號莊士倫敦廣場地下4&5號舖