南宮珉新劇《戀人》捲入性侵醜聞被抵制 電視台同涉案人割席

由韓星南宮珉主演嘅韓劇《戀人》即將開播，但未播就已經被網民發起抵制。該劇嘅幕後人員原來同南韓一宗轟動一時、導致受害人家破人亡嘅性侵案有關。

2004年，一名姓梁女子到電視台為劇集做臨時演員，但遭受經理人公司組長等12人性侵。事後受害人報警，但警方處理案件嘅態度令佢再受傷害，甚至有報導指有涉案疑犯到梁女寓所縱火。受害人最終不堪壓力，於2009年輕生。而梁女細妹因為介紹家姐去電視台而深感內疚，幾日後同樣走上絕路。更慘嘅係，梁女父親喺女兒逝世後亦因為腦溢血過身，令梁媽媽一時間痛失三位至親，健康大受打撃，要靠藥物維持。

梁媽媽決意為女兒討回公道，多年來出入法院打官司，但2015年法院以案件逾時為由判佢敗訴，被告更加連錢都唔使賠。梁媽媽發現12名被告當中，有7個人仍然喺電視圈工作。近期梁媽媽得知部份涉及性侵案嘅臨時演員經理人公司職員，有份為《戀人》工作，於是發起抵制《戀人》，並得到網民支持。而開拍劇集嘅MBC電視台立即宣布「割席」，禁止涉案人士進出片場，並與該公司終止合約。

《戀人》原定於6月出街，但現時未知電視台會唔會抽起。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！