【又走一個】効力無綫25年黃德斌月底離巢

無綫藝人離巢嘅消息經常都有，最新就有効力25年嘅黃德斌。當有記者打電話向佢求證嘅時候，佢就話份合約仲傾緊，可能會以另一種方式合作，希望可以有機會試吓新挑戰，所以會同公司好好傾吓。

今年54歲嘅黃德斌係第14期無綫藝員訓練班學員，同期有郭富城、黎芷珊、劉錫明、林家棟、雷宇揚等等。不過之後一直做等閒角色，直至到1997年憑《真情》打出名堂，06年憑《火舞黃沙》終於奪得最佳男配角獎項。其後，再等到2011年拍神劇《天與地》先可以話真係上位，15年終於喺《刀下留人》同《鐵馬戰車》擔任男主角，可惜之後就再冇代表作。

作為一個咁好嘅演員，當然唔應該只係留喺無綫做奀星。黃德斌近期嘅工作大都喺內地，而且2013年拍完《金枝慾孽貮》之後離開無綫嘅戚其義亦邀請佢參與佢嘅首部內地劇《荔芳佢之後嘅街之海岸風雷》，仲會拍足780集，可以話係內地版嘅《真情》。有咁多人仔賺，黃德斌被問到係咪係唔係將工作重心放喺內地嘅時候，佢就話冇特定地方做嘢，演員都希望有唔同嘅合作空間。咁係咪即係如果ViuTV邀請佢拍劇嘅話，佢都有可能答應呢？

不過回想返當年佢同林保怡、陳豪、佘詩曼一齊拍《天與地》，如果佢真係離巢，就只會剩返陳豪一個喺無綫，諗落都有啲可惜。不過為咗好演員嘅前途著想，大家一齊祝福佢啦！