反口拍打戲 龔嘉欣學劏豬 街市搞搞震

無綫花旦龔嘉欣於新劇飾演「豬肉妹」，為了演出劏豬神髓，專程到街市偷師，但冇幫襯之下，被豬肉檔老闆眼睥睥！曾表明不再接拍打戲的她，被監製氹掂「復出」再做打女。

無綫新劇《四十二章經》昨日舉行拜神儀式，演員陳豪、龔嘉欣、江嘉敏、周嘉洛、鄺潔楹（Judy）等以劇中造型亮相，當中以嘉欣的生鬚豬肉妹Look、爆炸頭Judy及剪去長髮的江嘉敏最搶眼！

陳豪兩步成詩

陳豪透露飾演大學中文系教授，熟悉詩詞歌賦。問到背詩是否感到吃力？他冷笑表示冇問題，又自詡是詩人、中文水平高，大爆私下經常吟中、英文詩冧老婆：「返去摷出嚟畀大家睇，哈哈！覺得詩有種愛嘅情感存在。（七步成詩？）兩步都得！」

嘉欣表示其角色是天生神力的豬肉妹，自爆除了跟師傅學斬豬肉外，有日更去街市觀摩，被店主報以奇怪眼光：「覺得我唔買嘢，企咗喺度半個鐘好奇怪。（有冇斬到手痛？）虎口位起繭同損咗。」曾揚言不再拍打戲的她，笑言被監製游說後「落疊」，打鬥戲份比《殺手》還要激烈，一打十好忙！

鄺潔楹擬開健身室

至於Judy表示本來想電爆炸頭，惟髮量不夠又怕不連戲，最後決定駁假髮：「依家每次都要用個半鐘去駁髮同化雀斑妝，依家頭髮多到要撥開先聽到人哋講咩，呢個造型簡直係走在潮流尖端，係今年嘅突破！」講到她最近投資5位數字於網上開曲奇店，她表示希望明年進駐商場開實體店，繼而自爆稍後跟伍富橋等合資7位數字開健身室，向事業型女性進發。