反黑英雄丨何沛珈與陳山聰演情侶充滿浪漫氛圍 家居造型亮相勁吸睛 網民： 勁有GF Feel

TVB警匪新劇《反黑英雄》今個星期首播，陳山聰、張振朗、袁偉豪、張頴康、朱晨麗、姚子羚、傅嘉莉、黃子恆、林景程及何沛珈等人主演，劇情由2019年發生一單槍擊案而展開，主打「港式暴力美學」喺橫街窄巷及鬧市中上演搏鬥情節，以及黑幫之間嘅惡鬥招數。劇集除咗由去年叫好叫座嘅《新聞女王》總監製鍾澍佳和《星空下的仁醫》監製方浤酌強強聯手，更是姚子羚首度挑戰江湖大嫂，非常有睇頭。另外，上位小花何沛珈（Roxanne）喺劇中飾演英文補習老師林冰與陳山聰首演情侶，經過大晒小背心家居Look，成功吸引網民關注。

何沛珈喺劇中飾演英文補習老師林冰喺關智軒（陳山聰飾）嘅女朋友，雖然佢哋嘅真實年齡有少少差距，不過冇阻佢哋嘅甜蜜互動，前晚（25日）及噚晚（26日）播出嘅第二及第三集，何沛珈更以家居造型演出，盡騷Fit爆身材及招牌長腿，成為網民焦點，留言大讚「何沛珈正到」、「Miss Lam好靚呀」、「眼前一亮呀 Miss Lam! 勁有GF Feel!」、「我都想補英文啊」、「演技出色。加油啊！」及「形象清新自然」等等。

何沛珈接受傳媒訪問時被問到有冇向視帝陳山聰偷師，佢就話自己原本嘅性格比較硬朗，所以某一啲位會演繹得硬咗啲，而山聰就建議佢撒嬌多啲。至於佢哋嘅甜蜜鏡頭，佢就話佢哋拍咗屋企嘅戲份先，所以warm up嘅時間唔多；而佢哋喺排戲時都會預先溝通好，所以就冇好尷尬同緊張，反而有一場臨時加嘅山聰抱起佢嘅戲，佢就擔心自己太重責親佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！