《反黑路人甲》張振朗裸體逃跑好搶鏡 細數近年為拍劇犧牲色相男藝人

無綫黑色喜劇《反黑路人甲》喺噚晚首播，劇集搵嚟王浩信、張振朗、馮盈盈、湯怡及高海寧等人主演。第一集劇情就講到戲痴張細倫（王浩信飾）參加試鏡，不過就觸怒女明星Angel（高海寧飾），後來仲因為喝醉酒而同蘇芷珊（湯怡飾）發生一夜情。另外，聯旺勝掌舵人喪鐘（徐榮飾）想繼任坐館，但喺會上有叔父透露蔣定邦仲有一個私生子喺美國，於是蔣家大小姐蔣千霞（賴慰玲）就諗出一條計仔，就係令助手高彬（張振朗飾）以駙馬嘅身分選坐館，仲話要即場同佢發生性行為，裸體嘅高彬就借機逃跑，被張細倫當場捉住。如果要數噚晚最深刻嘅鏡頭嘅話，相信唔少人都會話係張振朗裸體逃跑呢一場戲。

其實過往都有唔少男藝人為劇集效果，不惜剝光豬演出，不如而家就同大家數一數近年為無綫劇集犧牲色相嘅男藝人啦！

張振朗
張振朗喺《反黑路人甲》中飾演臥底高彬，佢今次可以係博到盡，除咗漂成一頭白髮之外，噚晚仲要為咗劇情需要而犧牲色相。除咗《反黑路人甲》之外，張振朗喺《全職沒女》都有試過全裸演出，飾演太子爺嘅佢太子爺喺酒店泳池裸泳。

胡鴻鈞
喺《降魔的》飾演精靈「石敢當」嘅胡鴻鈞，沉睡三百年嘅佢，因為小馬（馬國明飾）嘅一篤尿而被喚醒。之後，佢以人肉真身出現喺小馬屋企，仲要露埋股。

C君
《降魔的》就有胡鴻鈞嘅大膽演出，續集就由C君接捧。C君喺《降魔的2.0》中飾演精靈「風獅爺」，性格活潑可愛又搞鬼，好鍾意偷窺別人裙底。佢喺一出場就全身赤裸，只係披住紅色嘅披件，場面搞笑。

陳榮峻
老戲骨陳榮峻喺處境劇《愛•回家之開心速遞》中飾演譚道德，為人比較墨守成規又思想老舊，不過佢同「廢青安」安仔（周嘉洛飾）嘅互動就經常笑料百出，好似安仔去譚家進行「再教育」，期間仲要罰抄《道德經》，安仔唔小心將對方嘅珍貴墨本跌落街。譚道德喺沖涼時唔記得拎毛巾同衫褲，佢以為老婆同安仔唔喺屋企，所以就赤條條咁行返睡房，點知安仔原來開緊直播，搞到佢直播裸體。

周嘉洛
周嘉洛憑《愛•回家之開心速遞》「廢青安」一角成功入屋，深得歡眾喜愛。周嘉洛喺《愛•回家之開心速遞》間唔中都有騷肌鏡頭，今年仲有「全裸」演出添呀！嗰集劇情講到安仔被母親熊尚善（滕麗名飾）整蠱，被困喺充滿屎尿嘅廁所，為咗逃避佢被迫全裸出窗。

張景淳
張景淳喺《愛•回家之開心速遞》中飾演龔燁，同女朋友熊若水（呂慧儀）經常出雙入對，呢pair情侶深得唔少觀眾喜愛。張景淳間唔中都有為劇集獻身，大騷FIT到爆嘅身形，除咗僅以粉紅色底褲演出及半裸上身之外，佢仲試過飲醉全裸，兼被人拍低裸跑嘅短片。

王浩信
王浩信可以話係近年為無綫劇集裸露最多嘅男藝人，佢分別試過喺《不懂撒嬌的女人》、《致命復活》及《EU超時任務》犧牲色相，難怪曾經有網民問過「為何王浩信總是裸」。

黃浩然
黃浩然喺《賭城群英會》飾演吹水文，劇情講佢被吳家樂綁架，之後仲寫「淫蟲」兩字喺面上兼被除晒衫褲。

關楚耀
關楚耀喺《特技人》中飾演電影導演Duncan，為劇集努力操肌嘅佢，除咗有赤裸上身沖涼之外，仲有裸跑場面。

張漢斌
喺《棟仁的時光》飾演管理處主管嘅張漢斌，喺劇中經常欺壓光蘇伯伯（鄭敬基飾），所以被袁偉豪懲罰將佢剝光豬。