可預視的悲劇 ⎮ 我們都眼巴巴看着小鯨殤逝

一條布氏鯨約兩周前誤闖香港水域，自本月（7月）13 日被人發現游弋於西貢海面後，從此成為「野生捕獲」對象，約一周前更被發現背部受傷，懷疑被船艇螺旋槳擊中。至今日上午（31日），一條鯨魚曝屍西貢牛尾海，出海追鯨熱潮結果以悲劇告終。多位藝術家以畫作表達哀思，以下為他們的作品和心聲。

平面設計師劉仁顯：唔見有實際行動去幫佢

好惋惜同無奈，好似都兩個星期？可能我唔知啦，又唔見有咩人有實際行動去幫到佢，連去停止啲人去圍鯨都無。所以其實除非佢自己識走啫，如果唔係，其實都幾預視到有今日嘅結果吧。

打風果兩日有諗過啲人唔出海可能係佢走嘅機會，不過又應該佢都會好驚吧？

藝術家 Error：一味呼籲同呼籲

令人傷感同無奈，我唔會話係香港人殺咗鯨魚、或者鯨魚嚟到香港一定係死路一條；因為其實我見到好多人或團體都好把握機會做公眾教育同海洋生物教育，而租船同追鯨嘅人相比下係少數，當然呢班人係一定有責任。

最難過就係有人好努力去教育、去保護，同時有人直接或間接拎鯨魚滿足自己嘅私慾，最後鯨魚死咗，無人需要負責。 其實政府除咗一味呼籲同呼籲，就好似零行動，又話追鯨會罰款或坐監，但暫時一個受問責或被起訴嘅人都未見有。

插畫師 Maf Cheung：一窩蜂湧去實在太跨張

雖然香港好少見到鯨魚游入來，好似奇景咁，一窩蜂湧去實在太誇張。明明都有組織表示鯨魚好易受驚，即使唔睇呢啲報道，都應該有返個常識，佢地野生動物來，人類太近係會驚的，其實無必要令佢地受傷害。

畫家癲噹 Din Dong：希望大家更多愛心

見到呢件事好唔舒服，我們有養小動物，明白動物其實好需要空間，留意到海洋專家還說鯨魚是高敏感類，希望大家對愛護動物有更多關心和愛心。

藝術家 Joey Leung：追鯨的人是兇手

有份追鯨的人，都係兇手！為咗打卡，害死一條美麗而偉大的生命。