東張西望︳何伯何太今晚先現身網民鬧爆 再爆金句「我娶第個佢哋一樣反對」

今期熱話何伯何太「可歌可泣」嘅愛情故事，本來《東張西望》出預告訪間片段，唔少觀眾以為有得母親節「加餸」咁著數，點知星期日晚嘅《東張》，只係喺節目尾聲先播出第二條預告，真正訪問到周一晚先（可能）出街。好多網民都鬧爆 TVB。

前晚《東張西望》尾聲，何太大爆「阿叔畀咗身體我，畀咗肉體我，就留咗啲錢畀佢仔女保管。佢仔女攞錢去，我就要跟佢捱苦，先證明到人哋係真愛，咁傻嘅？唔通有錢就唔係真愛咩？咁奇怪。」

而尋晚《東張西望》再播另一條預告入面，被指別有用心嘅何太回應時話「冇呢回事囉！我點解要當佢獵物呀？我當佢係寶好唔好呀？真係奇怪㗎啲人」。何伯為愛情同5個仔女反面，何太認為一班「仔女」根本反對老父再婚。「佢再娶，個女人唔係我，佢哋一樣反對。你信唔信？」。何伯認同之餘仲大鬧仔女「佢哋爭遺產咋嘛」，對於外界「提醒」，何伯同樣冇理。「佢（何太）成日煲湯畀我飲，個個都話『飲死你呀，有毒㗎啲湯』，飲死我？越飲越精神。」而何太更宣示主權「我名正言順，成為咗合法夫妻嘅話……咁佢哋就冇咗繼承權，咪先下手為強」，似乎今晚會一地花生殼！

而根據網民爆料，之前有傳何太已離港避風頭，但就有最新網友拍攝照片指何太何伯現身屯門買餸。而日前網民聲稱喺深圳影到佢地出街食飯嘅相，但二人衣著同《東張》訪問一樣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！