【叱咤2020】姜濤陳卓賢Mirror力爭我最喜愛四大獎項 大贏家隨時係ViuTV?!

《2020年度叱咤樂壇流行榜頒獎禮》嘅四個「我最喜愛」大獎係靠樂迷投票得出結果。以往「我最喜愛的歌曲大獎」由頒獎禮現場觀眾投選，但係呢2屆由於無招待現場觀眾，機制同男女歌手及組合一樣由樂迷網上投選。

4個大獎嘅最後5強已經誕生，到底邊個會喺元旦當日，獲得呢份由全港樂迷合力送出嘅新年禮物？

我最喜愛的組合

MIRROR粉絲嘅動員力驚人，去年同一獎項上不敵RubberBand之後，「鏡粉」今年應該落力箍票。RubberBand去年喺社會動蕩期間仍然發聲，贏得唔少樂迷支持，但係今年氣氛轉變，會唔會有影響呢？獎項另一黑馬應該係今年3首派台歌都有幾好反應嘅Dear Jane。

預測得主︰MIRROR

我最喜愛的女歌手

估計Serrini、方皓玟同林二汶機會較大，而且爭持激烈。方皓玟越來越有觀眾緣，早排開網上個唱都有過萬人收睇，而且係呢個獎嘅2屆得主，前年令佢斷纜嘅謝安琪5強不入，似乎形勢大好。

林二汶今年有冠軍歌《再聚》，雖然成績不及去年叱咤十大《最後的信仰》，但係年尾以導師身份參與《全民造星3》，因為節目人氣大盛而扳回聲勢，加上首次入圍5強，應該會有唔少人支持。

Serrini雖然係獨立歌手，但係網路人氣超強，而且唔少樂迷都想睇言行「跳掣」嘅Serrini上台會講咩感言，好有可能出現前年嘅「古天樂效應」！

預測得主︰Serrini

我最喜愛的男歌手

再次強調「鏡粉」動員力驚人，一次過保送姜濤同Ian入圍之餘，就連另一MIRROR成員Jer（柳應廷）都入到7強，相當厲害。但係「鏡粉」點樣配票先可以令姜濤同Ian其中一個上台？而向來敢於發聲嘅鄭中基估計都有唔少「黃票」支持，加上「暴龍哥」本身鐵票唔少，有望喺「鏡粉」票被分薄嘅情況下殺出重圍，入行廿幾年來首次獲得「我最喜愛的男歌手」。

預測得主︰鄭中基

我最喜愛的歌曲大獎

再三強調「鏡粉」動員力驚人，但仍然需要面對票源分薄嘅情況。《一人之境》及市場反應唔錯，但又未到《呼吸有害》呢種年度大熱嘅流行程度，所以應該由My Only One 同《銀河修理員》一較高下。Dear Jane人氣係高，但睇返「我最喜愛的組合」連續7屆入5強都係空手而回，可能粉絲冇咁積極參與投票，因此估計「暴龍哥」再下一城。假如賽果一如預測，最大贏家就係Viu TV，因為旗下嘅Mirror、劇集《暖男爸爸》主題曲同男主角都得獎，4個項目中3個！

預測得主︰鄭中基 My Only One