叱咤2022︳陳卓賢Ian有望首奪唱作人獎 生力軍Jeremy李駿傑爭金有暗湧

踏入12月,距離商台《2022年度叱咤樂壇流行榜頒獎典禮》截數時間越來越近,各個計算播放率嘅獎項亦開始有眉目。今日先預測男女歌手及組合獎以外嘅形勢。

Jeremy 李駿傑
Jeremy 李駿傑

近年香港樂壇重新獲得樂迷注意,新人輩出而且實力唔錯,上年叱咤再次將生力軍獎分為男、女歌手及組合3個組別,估計今年亦有同樣安排。生力軍男歌手方面,目前領先嘅有MIRROR成員Jeremy李駿傑、《造星3》十強之一CY陳宗澤同埋英皇嘅19歲新人黃明德(Dark)。3人之中Jeremy暫時有2首單曲(《半》、《九》)獲得亞軍稍為領先,而黃明德就以4首全部打入十大嘅上榜歌憑數量取勝,至於CY亦有一首亞軍歌在手。現時Jeremy稍為領先黃明德,但3個人近期仍然有新歌上榜,賽果仍有暗湧。

雲浩影
雲浩影

同CY一樣《造星3》出身嘅Cloud雲浩影,暫時喺生力軍女歌手歌曲播放數稍為領先,最大對手係上年生力軍女歌手金獎張蔓姿嘅妹妹張蔓莎,2位女新人同樣有4首歌上榜,一樣有一首亞軍歌。而去年同MC $oho & KidNEy 合唱《係咁先啦》嘅kayan9896(吳家忻)有機會獲銅獎。至於生力軍組合獎大有可能由《造星4》參加者組成嘅3隊女團瓜分,由ViuTV及Makerville力捧嘅COLLAR新人年就有2首冠軍歌,肯定係金獎得主。而另外2隊女團Lolly Talk 及STRAYZ預計分別會得銀獎及銅獎。

另一個獎項組別「叱咤唱作人大獎」競爭頗為激烈,全年有3首作品成為冠軍歌嘅,唔止當時得令嘅林家謙,仲有商台自己人林海峰。而今年有2首冠軍作品嘅分別有馮允謙及MIRROR成員陳卓賢(Ian),但Jay Fung嘅《給缺席的人唱首歌》上榜時間較長兼上過亞軍,暫時比Ian領先。因此最終賽果,除咗視乎馮允謙及Ian正在上榜歌曲嘅最終播放數字外,亦要睇埋林海峰係咪「落場」爭獎。

Ian 陳卓賢
Ian 陳卓賢

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!