同老公變分飛燕 寂寞人妻王敏奕 靠「網友」慰藉

藝人王敏奕與曾國祥日前迎來結婚兩周年，但原來老公去了英國拍攝美劇，預計要分開7至9個月，惟有靠視像維繫感情，笑言要由夫妻變「網友」！至於昨日生日的劉佩玥亦與緋聞男友周志文分隔兩地，未能一同慶祝。

袁偉豪、陳家樂、王敏奕及劉佩玥（Moon）等，昨日在將軍澳電視城宣傳劇集《把關者們》，適逢是Moon生日，大會特別送上生日蛋糕慶祝。壽星女透露生日不用開工，會與家人食飯慶祝，又笑言雖然是32歲生日，但看上去只似24歲，比王敏奕還要年輕，敏奕沒好氣笑說：「女演員年紀冇乜所謂，年紀愈大反而可以演更多唔同角色。」Moon被問到緋聞男友志文有何表示？她笑問：「黃智雯？（周志文呀！ ）佢返咗內地做嘢，不過都有同我講生日快樂。」

而日前是敏奕結婚兩周年的日子，但她指老公曾國祥目前身在英國開工，問到會否赴當地探班？她說：「因為要隔離，所以暫時去唔到。我本身喺香港嘅工作排到出年，預計要分開7至9個月，要靠視像維繫，變咗網友，哈哈！」

陳家樂放閃面紅紅

至於家樂劇中飾演海關關員兼前劍擊運動員，事前上堂學劍，但自嘲有姿勢冇實際。袁偉豪「爆料」指第一次見面時覺得家樂有點Cool，開工後卻發現大家很投契，家樂反擊笑說：「你當時結婚，我哋都係睇報道先知！（咁你會唔會效法拍檔閃婚？）唔講呢啲喇！」

提到前日與女友連詩雅各自在社交網分享出海滑浪的照片「放閃」，似乎想戀情浮面，家樂面紅紅笑說：「我想閃令令係我身形上，拍《把關者們》嗰陣開始操肌增磅，肥到豬頭咁，近幾個月畀心機去操、減脂。（戀情浮面？）希望大家將焦點放喺我嘅工作、身形上，依家操弗第一階段，大家唔好諗太多，總之玩得開心啦！」