【名師教路】 15個實用旅行攝影秘技

好羨慕啲人去旅行影到靚相呢？就算唔係用專業相機，都可以影到呃like靚相，原因唔係在於技術，係在於每個攝影題材都需要嘅角度。新晉旅遊攝影星級博客Laurence Norah最近就喺網上教大家，唔同題材，有唔同嘅攝影秘技，出發前惡補下啦！

1. 海灘
去馬爾代夫呢D天堂，無理由影唔到靚相呀？就係茫茫大海加日出日落先至難到攝影初哥，Laurence就提醒，避免太陽喺頭頂果陣影，因為光線影響拍攝之外，亦唔好曬親自己咁辛苦。

2. 雪景
如詩如畫嘅雪景，睇就緊係靚，但一影相就會發現問題，就係光線會因為雪嘅折線，而搞到好多時會曝光過度。好多相機都有曝光補償，可以透過呢個功能去調節加或減少，就可以大大解決過曝嘅問題。

3. 天陰有雨
既然改變唔到天氣，就改變心情。去旅行落雨真係好灰，但Laurence都話，其實落雨都可以有好多樂趣，就算個天灰灰暗暗，一樣會有好多層次，有時朦朦地影人仲Soft重靚啦！

4. 行山
上到山，見到一般人見唔到風景，感覺會好爽。Laurence建議，可以多利用自然嘅資源，例如︰影條山路，或者影埋對腳入去營造比例。

5. 夜晚室外
Laurence都坦白講，夜晚喺室外影相，真係超級困難，好似影流星雨或北極光。要部相機本身好勁，大光圈、快門、感光晶片等都要好強，如果你部相機冇咁勁，或者得部電話，咁至少要有腳架或固定器材，至少影落唔會手震先啦。

6. 水
無論你喺水入面或會濕水嘅環境，都要小心攝影器材，唔濕得水的話，就要有相應保護設施，防水殼或直接用水底攝影機，咁可以影到更多動感嘅水花相。

7. 街頭
街頭喺好典型旅行攝影題材，好容易影到地道感覺，反映出當地文化。但Laurence就提醒，唔好顧住低頭影相，記得抬起頭，唔好忘記我哋對眼嘅用途。

8. 室內
室內影相其實都好棘手，好似酒店、餐廳等，因為冇足夠光線，影相好易會太暗。建議用三腳架，慢快門影，又或靠窗邊影，多利用自然光。

9. 朋友
Laurence建議偷偷地咁影你嘅朋友，偷影緊係唔好，但偷影你朋友就冇所謂啦。偷影可以影到你朋友最自然同突顯到個性，好過張張擺pose咁悶呀。

10. 陌生人
想影陌生人，要識尊重，問人影唔影得先好影，甚致影完，俾佢哋睇下，開個話題，同佢哋傾下偈，咁樣再影出黎嘅相會更有故事性同生命力，相信亦係識女仔嘅技巧。

11. 動態
要影動態景物好似煙花，最好用單反相機，因為可以輕易控制到快門，將高速郁緊嘅嘢捕捉到。如果冇單反，其實部份手機已經可以調節快門，一樣可以影到。

12. 動物
搵下佢哋有趣嘅角度同時刻，好似低炒又或主觀鏡咁影，咁就可以影到佢哋最自然嘅一面。

13. 食物
食物係社交平台Instagram最多人上載嘅主題，試下用多啲唔同角度去影，例如︰鳥瞰。Laurence講到一個秘技，都喺光線問題。自然光當然最好，但冇的話，就要搵下其他光幫手，甚至利用餐巾做折射補光。又建議用大光圈製造「淺景深」的效果，即前清後矇的相片，更能突出食物。

14. 景觀
要影到良好嘅景觀，分別在於夜晚同日頭，簡單講，搵到合適光線好緊要。Laurence就提到，攝影入面有個「魔法時間」(Magic Hour)，就喺日出同日落嘅時間，果陣影嘅相真喺好似有魔法咁，特別靚。又提醒，影景觀嘅構都好緊要，要有前景、中景同背景，即喺要有層次。

15. 海景
Laurence建議喺高處影海景會比較好，將海成為天空嘅前景，呢張相冇得彈啦。