吳亦凡捲入桃色風波 事業一鋪清袋被全面封殺 名字變神秘數字「1337000」？鐵粉出謀獻策想劫獄？

現年30歲內地男星吳亦凡被捲入桃色糾紛，上月31日遭北京警方刑事拘留，去到噚日，網傳吳亦凡牽涉9宗罪，當中包括「性侵未成年」、「迷姦」、「群交」、「毒品」、「性賄賂」，有內地律師指如查證屬實，至少判處三年有期徒刑，最高刑罰可判死刑，事件震驚各界。

品牌紛紛割蓆
捲入桃色風波後，吳亦凡形象瞬間破產，事業一鋪清袋，多個內地及國際品牌宣布與吳亦凡結束合作關係，更傳出佢今次有機會要賠超過4.5億元人民幣。

吳亦凡被內地全面封殺
有網民噚日發現吳亦凡嘅微博、抖音、百度貼吧及QQ音樂等多個網絡平台全被消失，連其音樂作品亦全面下架。其實唔止佢嘅網絡平台主頁被註銷，甚至連支持過佢嘅KOL，例如馬薇薇及六六等亦被禁言。

名字變神秘數字
雖然吳亦凡演出過嘅電影及劇集沒有被下架，不過佢個名就被消失，變成一組神秘數字「1337000」，吳亦凡呢三個字喺內地網站全面消失，多年嚟嘅演藝事業一夜間告一段落。

蠟像被換上囚衣？
吳亦凡嘅蠟像喺2015年進駐上海杜莎夫人蠟像館，喺佢被拘捕後網絡隨即傳出佢個蠟像嘅衣著由白色型仔西裝，被換成藍色囚衣。雖然唔知道佢嘅蠟像係咪真係俾人換咗衫，不過蠟像館嘅工作人員就表示由於關於吳亦凡現時好敏感，所以佢嘅蠟像已經暫時下架。

「入獄」劇照於網絡瘋傳
吳亦凡喺2016年曾參演電影《夏有喬木雅望天堂》，當時佢飾演嘅夏木替被性侵嘅女主角報仇，最終被送入監獄服刑。當佢被拘捕後，身穿藍色囚衣嘅電影劇照隨即喺網絡上瘋傳，唔少內地網民都話成件事實在太諷刺。

鐵粉出謀獻策想劫獄？
吳亦凡喺海外及內地都擁有超高人氣，所以有唔少粉絲仍然接受唔少偶像被拘捕。喺噚日更有人喺網上建立「吳亦凡救援群」群組，有群組內鐵粉齊齊出謀獻策，例如挖隧道劫獄、自己坐監換吳亦凡出獄、籌機票錢，甚至有人話中國警察同解放軍加埋得5百萬，不過吳亦凡嘅粉絲就有5千萬人，所以係可以救到佢云云。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！