吳孟達不敵肝癌病逝 終年70歲

·4 分鐘文章
吳孟達危殆轉入ICU 親友趕見最後一面
吳孟達危殆轉入ICU 親友趕見最後一面

【最新消息】藝人吳孟達不敵肝癌,在家人的陪伴下離世,終年70歲。

他2個月前曾做手術保命及接受化療,但今日情況轉為危殆,並陷入昏迷狀態,轉入ICU留醫,而醫生通知他的家人到醫院見他。而近日有不少好友探過他,吳孟達不停向好朋友講好痛、好辛苦,當時他每隔4小時打一次嗎啡止痛,但已起不到作用,他手上拿着檸檬,不時舐一舐,以刺激口腔分泌口水。

下午1時左右,好友艾威趕到醫院,神色凝重的他被問到是否見吳孟達最後一面?他回應:「係!」便匆匆上樓。艾威約下午2時半離開醫院,他說:「因為佢啲屋企人同摯友親朋個個做晒核酸,我哋只可以上去見一陣,唔可以逗留,所以見完佢都係返屋企先。(佢情況點?)大家都知,唔係太樂觀。(即係有心理準備?)係。」他亦謂有位好好的朋友一路陪伴吳孟達:「由佢一個月前喺澳門留醫嗰陣時開始,大約1個月前佢(達哥)微信講『你搵唔到我㗎喇』。」

他又謂吳孟達之前已做過1次化療:「佢話第1次打贏咗,跟住抖一抖再做第2次,我喺呢段期間每日都發個加油嘅公仔畀佢,唯一可以做到嘅嘢就係幫佢打氣。」他又透露對方已插喉,日前注射嗎啡,現時打了強心藥。問到對方可是昏迷?他謂:「係唔係昏迷呢?瞓着覺咁,不至於冇晒反應,又唔係聽到嘢咁。」他又謂對方太太、兒子、弟妹亦在場,但就未見到其母親,並希望對方可以大步檻過。下午近4時,駱應鈞到達醫院,神色凝重,急急腳行入去未有受訪。

田啟文在下午4時半現身受訪,透露吳孟達現時彌留狀態:「醫生話佢幾個鐘就會走,依家太太、仔女,屋企人都喺晒度。(佢有冇交代啲乜嘢?)佢之前唔知個情況會咁嚴重,所以完全冇交代,仲諗住可以康復出院見面,佢依家工作全部停晒。」其家人接受不了?他謂:「我唔方便透露,但相信冇人願意接受親人突然離開。(佢之前仲諗住會好轉,依家咁樣太突然?)肯定,我都希望佢會好番,但要面對現實,只可以接受。」

問到周星馳可知道達哥情況?他表示:「佢知道晒所有步驟。(會唔會嚟探佢?)佢淨係問我依家嘅情況,我都係啱啱先知道晒佢嘅情況,但佢家姐有做代表嚟探,希望大家唔好將個焦點拉埋周星馳嗰度。(周星馳有冇託你講乜?)佢之前都係講睇有咩方法可以醫到佢,但估唔到病情轉得咁快。」他又表示今早已有親密朋友來探達哥。問到可有與其家人討論身後事?他表示:「初步有傾過,我會全權做代表,圈中人想幫手都可以嚟幫,之後會舉行追思會。」他又謂達哥近年有儲蓄,未聽過其家人說有經濟問題。他又叫大家不要亂傳達哥去世的消息,因這對達哥不負責任及不尊重,他亦謂會繼續留在醫院幫手處理。

吳孟達早年曾因心臟衰竭險喪命,近年不時傳出身體情況欠佳,早前為電影《少林寺之得寶傳奇》拍攝海報時,他突然心臟不適,不停用手揉搓胸口,面露痛苦,之後曾到澳門醫治,直至上月月頭向身邊友人透露自己患病的消息,並指有很好的醫療團隊照顧他,而吳孟達太太亦已從馬來西亞來港照顧丈夫。