【吳孟達暴瘦?】達哥6年前心臟病入ICU 一度傳死訊 康復後減磅兼減產

最近內地演員釋小龍喺微博post咗張同吳孟達影嘅合照,原來佢地喺26年前就合作拍過電影《笑林小子》,釋小龍當時只得五六歲!唔少網友見到張相,都覺得達哥瘦咗好多,留言叫佢保重身體。

睇返張相,達哥又唔算瘦咗好多,其實佢幾年前心臟有事,執返條命之後已經清減好多。

68歲嘅達哥近年主力北上搵食,2014年時因病毒感染而心臟衰竭,被送入ICU搶救,醫生仲叫達哥屋企人去醫院,原來當時仲係清醒嘅達哥,心臟功能得返4成唔夠,好在治療後康復並無大礙。不過當時網上已經誤傳達哥不在人世,認真大吉利是!出院之後,達哥話寫好晒遺囑,為家人做好準備。

曾於鬼門關走過一次的達哥,2018年接受傳媒訪問時表示患上糖尿病。達哥當時已患有糖尿病約兩年,因為患病令達哥更加注重健康,戒煙戒酒兼早睡早起,食飯都只食7成飽,而且仲多做日式瑜珈鍛鍊身體,又跟朋友介紹嘅天然療法浸暖水,改善心臟功能。達哥大病前後足足瘦咗成個碼,但係睇落精神同氣息都幾好!改變生活習慣之餘,達哥亦都為身體著想減產,最多都係拍廣告同出席活動,直至近排先至準備拍返戲。

【相關搜尋】吳孟達痛恨周潤發