周柏豪內地表演rap 網民恥笑「好尷尬」保錡＠ERROR極速抽水模仿

近年主力北上發展嘅周柏豪，似乎更為放得開。過去喺香港力sell潮男形象同音樂行先嘅柏豪，早前喺內地綜藝《我在橫店打籃球》居然high爆表演rap，你想唔想像到？

《我在橫店打籃球》搵一班藝人參與籃球賽，打過青年軍嘅柏豪當然有份落場。喺球賽休息時間藝人們冇得抖仲要出戰freestyle rap battle，同場嘅藝人卡斯柏（儲曉祥）、李大奔rap得有板有眼。

到唔係呢類風格嘅柏豪出場時，節奏同感覺明顯唔係嗰回事，而佢rap嘅歌詞「大家好大家好，我就是那個周柏豪。我現在rap，你是不是覺得很好笑。我哇哦（wow），你們每一個都好像小寶寶。快來，讓叔叔給你抱一抱」。片段傳到香港之後，網民紛紛負評恥笑話周柏豪rap得好尷尬。不過同場另一藝人俞灝明都唔係「街頭風」藝人，佢索性以廣東話rap，尷尬程度同柏豪差唔多。另一女藝人許諾更加搞到好似數白欖，觀眾應該睇得相當難受。

柏豪呢次「驚世演出」流傳唔夠2日，ERROR成員吳保錡話咁快就喺周末一個商場活動中模仿，仲將片段post到IG，並抵死地寫道「最近聽到的一個音樂創作，十分respect，在足球比賽後，忍不住，輕輕唱一個吧」。保錡之前曾經話，唔應該取笑近期因升中派位受訪時話「讀書我本份」小學生，於是有網民留言問保錡「你抽周柏豪水又得嘅？」，保錡就回覆「寶寶，他是一個表演來的，想來抱一抱嗎」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！