周柏豪出席商場直播見面會 網民狂派過萬嬲怒斥

周柏豪曾喺社交媒體表態「感激自己身為一個中國人」，唔少粉絲都對佢「愛國歌手」呢個身份感到失望，引發割席潮；最近佢又成為話題人物，參與無綫《萬眾同心公益金》同鄭融合唱《一事無成》被指同失業家庭「贈興」，又喺Instagram大曬李寧牌送畀佢嘅籃球鞋。除此之外，仲有商場邀請周柏豪出席下周二（8日）舉行嘅粉絲見面會，商場官方Facebook專頁帖文表示，見面會以直播方式進行，仲以「人氣歌手」、「男神」形容周柏豪，截至今日中午1時已惹來1.3萬個網民派嬲。

周柏豪將會喺直播見面會分享新手爸爸心得，同埋介紹商場打卡位，不過就需要成為會員，消費滿指定金額同追蹤商場社交平台官方專頁先可以參與到。網民紛紛洗版斥責主辦單位無市場觸覺，指周柏豪係「人棄藍神」、「人棄歌手」，仲話從此可以罷去呢個商場，留言：「你漏左個tag呀#過氣」、「叫佢去隔離派傳單算啦」等等。

有網民仲畀建議主辦單位，指大會可以安排大合唱《我愛祖國》，同埋建議搵人氣偶像MIRROR同ERROR，甚至係ViuTV二三線藝人都好過搵周柏豪。不過，亦有一批網民留言表示支持周柏豪：「很期待與隊長Online見面」、「希望唔好咁快換哂，等埋我呀」、「期待著，希望我會是其中一位幸運兒」等等。而周柏豪亦有喺Instagram宣傳見面會，不過就已將留言功能關閉，網民無得表達意見。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！