哈哈，我是「董建華」！

【星島日報報道】昨午，一邊唱張國榮的歌《打開信箱》：「打開信箱，內里得一片片迷惘；打開信箱，期待中憂鬱的眼光……」一邊開信箱。收信那種充滿期待的感覺，絕非現今的電子郵件可比。尤其，若收到封親筆信，在今時今日今年代，真是極窩心的一擊！其實，大家明，不過冇人會再主動做這種人與人之間的浪漫交往了，非常可惜。今天凡打開信箱，通常五成為廣告宣傳品，另五成，則是商業或政府公函，全部冷冰冰。 昨天大堆「無謂」信中，見到一張請柬，乃某某大學某某學系五十周年紀念。嘩！真重錘！竟然租下會展中心Grand Hall搞大佢！咦，究竟要幾錢呢？不過，當然不用小弟擔心，大家睇睇，前周中文大學也在會展搞紀念大騷，梁鳳儀出手，即請得陳寶珠、梅雪詩及「唐太后」（唐英年媽媽）表演，立時一晚籌得四千萬元！當中，一千萬元就由梁博士愛夫黃宜弘重錘捐出，服晒！ 大家可知，如今營運大學，經濟上有幾困難？慘 ，所所大學要自己身水身汗籌款外，更要打崩頭爭兩種學生——成績好的及有錢的，尤其碩士及博士學課程，多人讀，就可成為大學經濟命脈，不停輸血。故此，所所大學都要谷宣傳！ 講番某某大學大型紀念，睇睇，都算巴閉，請到仍然在政壇非常活躍（兼有決定性影響力！）的前特首主禮……不過，咦咦咦，再睇清楚……有 唔妥 ！為乜董建華英文名Tung Chee-Hwa下面，乃小弟個中文姓名及地址咁過癮的呢？ 我英文名為Tsang Chee Wah，董建華即是Tung Chee-Hwa，三個英文字有兩個字不同，點可能會搞錯的呢？以前某記者會，已試過有新聞界稱 豐大班做「曾智華」（其實佢係歐智華！），你話……唉，幾尷尬呢？究竟，我應否應邀出席某某大學的紀念活動呢？董建華又收唔收到信呢？ 阿碌開咪 曾智華 專欄